Devendra Fadnavis News: 'सिबिल स्कोअर' मागणाऱ्या बँकांवर गुन्हे दाखल करा; फडणवीसांच्या आदेशाने बँकांचे धाबे दणाणले

Mumbai : मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या अध्यक्षतेखाली आज राज्यस्तरीय खरीप हंगाम आढावा बैठक पार पडली आहे. यावेळी शेतकऱ्यांना येणाऱ्या वेगवेगळ्या अडचणी संदर्भात चर्चा झाली. याबरोबरच 'सिबिल स्कोअर'चं कारण सांगून शेतकऱ्यांना कर्ज नाकारणाऱ्या बँकांवर कारवाई करण्याचा इशारा फडणवीसांनी दिला आहे.

फडणवीस म्हणाले, "'सिबिल स्कोअर' चांगला नाही म्हणून शेतकऱ्यांना बँकेने कर्ज नाकारले तर त्या बँकांवर तत्काळ गुन्हे दाखल करा", असे थेट आदेशच फडणवीसांनी दिले. त्यांच्या या आदेशामुळे बँकांचे धाबे दणाणले आहेत.

"बँकांनी शेतकऱ्यांना कर्जाच्या स्वरुपात मदत करणं अपेक्षित आहे. मात्र, ज्या बँका शेतकऱ्यांना कर्ज देणार नाहीत, त्या बँकांवर तत्काळ कारवाई करणं गरजेचं आहे. शेतकऱ्यांना कर्ज देण्यास टाळाटाळ केल्यास गुन्हा दाखल करा, त्या बँकेवर कारवाई करण्यात येईल", असं फडणवीस म्हणाले.

दरम्यान, जलयुक्त शिवार योजनेच्या दुसऱ्या टप्प्याबाबत आजच्या बैठकीत चर्चा झाली. आता जलयुक्त शिवारच्या दुसऱ्या टप्प्याची सुरुवात करण्यात येणार असून जास्तीत जास्त क्षेत्र सिंचनाखाली आणण्याचा प्रयत्न असल्याचं यावेळी फडणवीस म्हणाले.

याबरोबरच शेतकऱ्यांना दिवसा वीज मिळवण्यासाठी सरकार प्रयत्नशील आहे. शेतकऱ्यांना 12 तास वीज देण्यासाठी सोलर योजनेचा देखील फायदा होणार आहे, असंही फडणवीसांनी सांगितलं.

Edited by : Ganesh Thombare