Gauri Palwe Death Case : 'आमची मुलगी लढाऊ, तिला खूप टॉर्चर केलं; पंकजाताईंचा संबंध नाही पण तो माणूस...'; गौरी पालवेच्या मामांचे गंभीर आरोप, नेमकं काय म्हणाले?

Mumbai News, 23 Nov : भाजप नेत्या तथा राज्याच्या मंत्री पंकजा मुंडे यांचे स्वीय सहाय्यक अनंत गर्जे याच्या पत्नी गौरी पालवे यांनी वरळीतील राहत्या घरी गळफास घेऊन आत्महत्या केल्याची धक्कादायक घटना समोर आली आहे.

मात्र ही आत्महत्या नसून हत्या आहे, असा गंभीर आरोप गौरी पालवे यांच्या कुटुंबियांनी केला आहे. गौरीच्या कुटुंबियांच्या आरोपानंतर अनेक तर्कवितर्क लावले जात आहेत. शिवाय एका मंत्र्यांचा पीए असल्यामुळे अनंत गर्जेवर कारवाई केली जाणार का? या प्रकरणातील सत्य बाहेर येणार का? असे अनेक प्रश्न उपस्थित केले जात होते.

अशातच मृत गौरी यांच्या मामाने पंकजाताईंचा या प्रकरणात काहीही संबंध नसल्याचं स्पष्ट केलं आहे. मात्र, आमची मलगी डॉक्टर होती. ती लढाऊ मुलगी होती. ती कधीच आत्महत्या करू शकत नाही, असंही त्यांनी म्हटलं आहे. डॉ. गौरी पालवे यांचा अनंत गर्जेंसोबत 7 फेब्रुवारीला विवाह झाला होता. त्यानंतर या दोघांमध्ये सतत वाद होत असल्याचं सांगितलं जात आहे.

शिवाय दोन-तीन महिन्यांपासून या दोघांच्यात वाद सुरू होता. गौरीला अनंतचे अफेअरच्या प्रकरणाची माहिती झाली होती. तरीही तिने त्याला माफ केलं. पण तो पुन्हा चॅटिंग करताना सापडल्यामुळे त्यांचा वाद टोकाला गेला. अंनत तिला खूप टॉर्चर करायचा असंही गौरीचे मामा शिवदास गर्जे यांनी सांगितलं आहे.

मात्र, या प्रकरणात पंकजाताईंचा काही संबंध नाही. हा माणूस किती नालायकपणा करत आहे, कसा आहे हे त्यांना माहीत नव्हतं, असंही मामांनी म्हटलं आहे. दरम्यान, पोलीस तपासात गौरी पालवेची आत्महत्या ही कौटुंबिक वादातून झाल्याची प्राथमिक माहिती समोर आली आहे.

या प्रकरणी वरळी पोलिसानी या मृत्यूची नोंद करून मृतदेह शवविच्छेदनासाठी केईएम रुग्णालयात पाठवला आहे. तसंच गौरी पालवेंचे दुसरे मामा हृषिकेश गर्जेंनी ही आत्महत्या नसून हत्या एका कुटुंबाने मिळून आमच्या गौरीची हत्या केली असून या प्रकरणाची सीबीआयमार्फत व्हावी, इन कॅमेरा पोस्टमार्टम करावे आणि आम्हाला न्याय द्यावा, अशी मागणी केली आहे.