Raju Patil: पालकमंत्रिपद कशासाठी ? सेवा करायला की मेवा खायला; मनसे माजी आमदार संतप्त

Mumbai 21 Jan 2025: राज्यात पालकमंत्रिपदावरून महायुती सरकारमध्ये राजकीय गदारोळ सुरू असताना नाशिक आणि रायगड जिल्ह्याच्या पालकमंत्री पद स्थगित करण्यात आले आहे. मनसेचे नेते आणि माजी आमदार राजू पाटील यांनी प्रतिक्रिया देत शिवसेना शिंदे गटाला टोला लगावला आहे.

"पालघर, रायगड, गडचिरोली यांची पालकमंत्रिपद हवीत कशासाठी ? सेवा करायला की मेवा खायला ? हे राजकारण्यांना माहीत आहे. त्यामुळे जे काय चाललंय ते त्यांना लखलाभो," असे टोला राजू पाटील यांनी 'x'वर लगावला आहे.

महायुती सरकारमधील पालकमंत्रिपदाचे वाटप करण्यात आले आहे. अनेक मंत्र्यांची पालकमंत्री पदी वर्णी न लागल्याने मंत्र्यांमध्ये नाराजी उफाळली आहे. पालकमंत्रिपदावरून रायगडमध्ये मोठा राडा देखील झाला. गोंधळानंतर महाराष्ट्रात रातोरात मोठ्या राजकीय हालचाली पहायला मिळत आहेत. यावर आता मनसेचे नेते, माजी आमदार राजू पाटील यांनी आपली प्रतिक्रिया दिली आहे.

ते म्हणाले,"पालकमंत्री पद कुठलं पाहिजे गडचिरोली, पालघर, रायगड..कारण रायगडला पोर्ट आहे, वाढवण बंदर येतोय पालघरला.. गडचिरोलीला खदानी आहेत, हे कशासाठी पाहिजे आणि त्याच्या माध्यमातून काय सेवा करायची की का मेवा खायचा हे आमच्यासारख्या राजकारणाला माहीत आहे. लोकांना ते माहीत नाही. डीपीडीसीमध्ये आम्ही पाहतो की केलेल्या मागण्या काही पूर्ण होत नाही. त्यामुळे ठीक आहे, जे काय चाललंय ते त्यांना लखलाभो.

ठाणे जिल्ह्याचे पालकमंत्रिपद उपमुख्यमंत्री एकनाथ शिंदे यांच्याकडे आले आहे. यावर राजू पाटील आपली प्रतिक्रिया देत शिंदेंना चिमटा काढला आहे. "आमची सर्वांची अपेक्षा होती की गणेश नाईक यांना पालकमंत्री पद मिळावे आणि ते असते तर आगरी समाजाला ही न्याय मिळाला असता ही अपेक्षा येथील लोकांची होती त्या अनुषंगाने मी बोललो की पालकमंत्रिपद आगरी लोकांना ठेंगा दाखवून गेले आणि शेवटी मुख्यमंत्री असताना आमच्या भागात काय झाले नाही तर पालकमंत्री असताना काय होणारे थोड्या आमच्या अपेक्षा होत्या परंतु त्या पूर्ण झाल्या नाहीत, असे त्यांनी म्हटलं आहे.