विनय सिंहला उच्च न्यायालयाकडून दिलासा ; परमबीर सिहांच्या आशा पल्लवीत

मुंबई : मुंबईचे माजी पोलिस आयुक्त परमबीर सिंह (Parambir singh) यांचा निकटवर्तीय विनय सिंह (vinay singh) याला फरार घोषित करण्याचा आदेश हायकोर्टाकडून (hc) रद्द केला आहे. विनय सिंह याला दंडाधिकारी न्यायालयाने फरार घोषित केले होते. या आदेशाला विनय सिंह याने मुंबई उच्च न्यायालयात आव्हान दिले.

न्यायालयाने याचिकेची दखल घेत विनय सिंह याला फरार घोषित करण्याचा आदेश रद्द केला आहे. त्यामुळे परमबीर सिंह यांच्याही याबाबत सकारात्मक आशा वाढल्या आहेत. खंडणीप्रकरणी परमबीर सिंह, रियाज भाटी आणि विनय सिंह यांच्या विरोधात गुन्हा दाखल करण्यात आला आहे. राज्य सीआयडी या प्रकरणाचा तपास करीत आहे.

विनय सिंह याने सत्र न्यायालयात अटकपूर्व जामिनासाठी अर्ज केला. सत्र न्यायालयाने हा अर्ज फेटाळून लावला. त्यानंतर विनय सिंह याने मुंबई उच्च न्यायालयात अटकपूर्व जामिनासाठी अर्ज केला. दरम्यान सीआयडीने या तीनही आरोपींविरुद्ध नॉन बेलेबल वॉरंट जारी केले. पोलिसांनी अटकपूर्व जामीनावर आपल्याला सोडून द्यावे तसेच खटला पूर्ण होत नाही, तोपर्यंत पोलिसांना अटक न करण्याचे मुंबई उच्च न्यायालयाने आदेश द्यावेत, अशी मागणी करत अँड. अनिकेत निकम यांच्या मार्फत विनय सिंह याने याचिका दाखल केली.

या याचिकेवर बुधवारी न्यायमूर्ती एस के शिंदे यांच्या समोर सुनावणी घेण्यात आली. विनय सिंहचे वकिल अनिकेत निकम यांनी फौजदारी प्रक्रिया संहितेनुसार प्रक्रिया न पाळता फरार घोषित करण्यात आल्याचा युक्तीवाद केला. नियमानुसार फरार घोषित करण्यापूर्वी आरोपीला ३० दिवसांची नोटीस देणे अपेक्षित आहे. मात्र या ठिकणी नियम पाळले गेले नसल्याचे निदर्शनास आणून दिले. न्यायालयाने हा युक्तिवाद ऐकून घेत दंडाधिकारी न्यायालयाने फरार घोषित करण्याचा आदेश रद्द केला.

परमबीर सिंह (Param Bir Singh) यांनी सत्र न्यायालयात एक याचिका दाखल केली आहे. ''आपल्याला फरार घोषित केल्याचा आदेश रद्द करा,'' अशी मागणी परमबीर सिंह यांनी या याचिकेत केली आहे. अधिवक्ता गुंजन मंगला यांच्या माध्यमातून त्यांनी सत्र न्यायाधीश एस.बी.भाजीपाले यांच्याकडे ही याचिका दाखल केली आहे. परमबीर सिंग यांच्या विरोधात मुंबई, ठाणे या ठिकाणी सहा गुन्हे दाखल आहेत.