मुंबई : सिटी सहकारी बँक (City Co-Operative Bank) गैरव्यवहार प्रकरणात शिवसेनेचे (Shivsena) नेते आनंदराव अडसूळ (Anandrao Adsul) यांना मुंबई उच्च न्यायालयाने दणका दिला आहे. त्यांनी अटकपूर्व जामिनासाठी केलेली याचिका उच्च न्यायालयाने (High Court) आज फेटाळून लावली आहे. त्यामुळे अडसूळ यांच्या अडचणी वाढल्या आहेत.
अडसूळ हे सिटी सहकारी बँकेचे अध्यक्ष असताना खातेधारकांचे पैसे बेकायदा पद्धतीने बांधकाम व्यावसायिकांना देण्यात आले. त्यात सुमारे 900 कोटी रुपयांचा गैरव्यवहार झाला, अशी तक्रार आमदार रवी राणा यांनी केली आहे. त्यानंतर सक्त वसुली संचालनालयाचा (ED) ससेमिरा अडसूळ यांच्या मागे लागला आहे. ईडीने त्यांना चौकशीला बोलावले होते. त्यानंतर प्रकृती बिघडल्याने रुग्णालयात दाखल असल्याचे सांगत अडसूळ यांनी ईडीसमोर हजर राहण्यास नकार दिला होता.
अडसूळ यांनी सुरूवातीला जामीनासाठी उच्च न्यायालयात याचिका केली होती. पण ही याचिका फेटाळत न्यायालयाने विशेष पीएमएलए न्यायालयात अर्ज करण्यास सांगितले होते. पण इथे जामीन नाकारण्यात आला. त्यानंतर अडसूळांनी उच्च न्यायालयात पुन्हा धाव घेतली होती. त्यावर शुक्रवारी सुनावणी झाली. उच्च न्यायालयानेही अडसूळांना दिलासा देण्यास नकार देत जामीन अर्ज फेटाळून लावला आहे.
ईडीने अडसूळ यांच्या कार्यालयावरही छापे टाकले आहेत. ईडीने दाखल केलेला प्राथमिक तपास अहवाल (ईसीआयआर) रद्द करावा आणि अटकेपासून संरक्षण मिळावे, अशी मागणी अडसूळ यांनी यापूर्वीच उच्च न्यायालयात केली होती. त्यावेळी न्यायाधीश नितीन जामदार आणि सारंग कोतवाल यांच्या खंडपीठापुढे आज यावर सुनावणी झाली होती. अडसूळ यांचा या गैरव्यवहारात कोणताही संबंध नाही. केवळ राणा यांच्या विरोधात निवडणूक याचिका केली म्हणून राजकीय हेतूने हा आरोप करण्यात आले आहे, असा युक्तिवाद अडसूळ यांचे वकील अॅड. अभिनव चंद्रचूड यांनी केला होता. खंडपीठाने हा युक्तिवाद अमान्य करीत अडसुळांची याचिका नामंजूर केली होती. त्यानंतर अडसूळ विशेष न्यायालयात गेले होते.
ईडीने चौकशी सुरू केल्यानंतर तब्येत चांगली असतानाही अडसूळ प्रकृतीची सबब पुढे करत वेगवेगळ्या रुग्णालयांत दाखल झाले. त्यामुळे तपास कसा करणार, असा सवाल अतिरिक्त सॉलिसिटर जनरल अनिल सिंह यांनी केला. अडसूळ हे सध्या एसआयव्ही रुग्णालयात दाखल आहेत. यापूर्वी त्यांच्यावर गोरेगाव येथील लाईफलाईन केअर रुग्णालयात उपचार सुरू होते.
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.