Bullock Cart Race News : भाजप आमदाराच्या नावाने बैलगाडा शर्यतीचा धुरळा; पण बक्षिसाची गदाच गेली चोरीला

Kalyan-Dombivli News : कल्याण पूर्वेतील खरड गावात भाजप आमदार गणपत गायकवाड यांच्या नावे आमदार केसरी बैलगाडा शर्यत भरविण्यात आली होती. मात्र, बैलगाडा शर्यतीचा धुरळा (Bullock Cart Race) उडाला पण तो थोडा उशीराने. स्पर्धेच्या ठिकाणी अंधार झाला. या अंधाराचा फायदा घेत थेट मंचावरुन चोरट्यांनी आपला हात साफ करत तब्बल दहा ते बारा गदा चोरुन नेल्या. यामुळे एकच गोंधळ उडाला.

पोलीस (Police) बंदोबस्त, आयोजकांची उपस्थितीत ही चोरी घडल्याने आयोजकांनी मंचावरून गदा चोर...ज्यांनी कोणी गदा चोरली असेल परत आणून द्या, असे आवाहन करण्यास सुरुवात केली. या घटनेचा व्हिडीओ समाज माध्यमावर मोठ्या प्रमाणात व्हायरल होत आहे.

ग्रामीण भागात बैलगाडा शर्यतींचा धुरळा रोज कोठे ना कोठे उडत आहे. मलंगगड परिसरात खरड गावात कल्याण पूर्वेचे भाजपचे (BJP) आमदार गणपत गायकवाड यांच्या नावे आमदार केसरी स्पर्धेचे आयोजन बुधवारी करण्यात आले होते. काकडवाल गावातील निलेश कान्हा पावशे यांनी या स्पर्धेचे आयोजन केले होते.

ही स्पर्धा उशीरा सुरु झाल्याने रात्री उशिरापर्यंत स्पर्धा सुरु होती. रात्रीचा अंधार पडल्याचा फायदा चोरट्यांनी घेत थेट मंचावरून बक्षिसांच्या रुपात ठेवलेली गदाच या चोरट्यांनी चोरुन नेली आहे.

स्पर्धेच्या ठिकाणी पोलीस बंदोबस्त, आयोजक, कार्यकर्ते यांची उपस्थिती असतानाही हा प्रकार घडल्याने आश्चर्य व्यक्त केले जात आहे. बक्षीस वितरणाच्या दरम्यान गदा चोरीला गेल्याची माहिती समोर आली. यानंतर आयोजकांनी गदा चोर म्हणत, ज्यांनी कोणी गदा चोरली ती परत आणून द्या, असे आवाहन करण्यास सुरुवात केली. मात्र, चोरटयांनी चोरलेल्या गदा परत केलेली नाही. याचा व्हिडीओ सध्या सोशल मिडियावर प्रचंड व्हायरल झाला आहे.

बैलगाडा शर्यतीच्या मंचावरून दहा ते बारा गदा चोरीला गेल्याची माहिती विश्वसनीय सूत्रांनी दिली आहे. मात्र, या बाबत अद्याप हिललाईन पोलीस ठाण्यात कोणत्याही प्रकारची तक्रार दाखल करण्यात आली नसल्याची माहिती पोलिसांनी दिली आहे.