Ritu Tawde Vs Kishori Pednekar : माझं माझं काय...? अडीच वर्षांचं तर हाय; पेडणेकरांनी महापौरपदाच्या कालावधीवरून रितू तावडेंची उडविली खिल्ली

Mumbai, 03 July : मुंबईत मॅनहोलमध्ये पडून एकाचा मृत्यू झाल्यानंतर आरोप-प्रत्यारोप जोरात सुरू झाले आहेत. विरोधी पक्षनेत्या किशोरी पेडणेकर यांनी महापौर रितू तावडे यांच्या कार्यालयात जाऊन अधिकारी-कर्मचाऱ्यांना धारेवर धरले. महापौर तावडेंनी पेडणेकरांवर विना परवाना माझ्या कार्यालयात येऊन मोठी चूक केली आहे, असे खडसावले होते. त्यावर पेडणेकरांनी ‘माझं माझं काय...? अडीच वर्षांचं हाय’ असे सांगून रितू तावडेंची खिल्ली उडवली.

किशोर पेडणेकर यांनी महापौरांच्या कार्यालयात येऊन रेखी केली. विना परवाना माझ्या कार्यालयात येऊन पेडणेकर यांनी मोठी चूक केली आहे. त्यांच्यावर गुन्हा दाखल करावा, अशी मागणी महापौर रितू तावडे यांनी केली होती.

माझ्या कार्यालयात यावरून पेडणेकर यांनी तावडे यांची खिल्ली उडवली आहे. पहिल्या दरवाजापासून केबिनपर्यंत महापौरांचा वावर असतो, त्यामुळे त्यांचं ते केबीन असेलही. पण तो वावर मुंबईकरांसाठी असतो, त्यामुळे तो अधिकार विरोधी पक्षनेत्यालाही असतो. त्यामुळे माझं माझंय काय आहे...अडीच वर्षांचं हाय...चांगलं काम करा, असा सल्लाही त्यांनी तावडेंना दिला.

महापौरपदाच्या आरक्षणाचा अडीच वर्षांचा कालावधी आहे. दुसरं आरक्षण निघाल्यावर निघायचंच आहे, असे सांगून पेडणेकर यांनी माझं माझं म्हणणाऱ्या रितू तावडे यांना चांगलंच सुनावलं आहे. महापौराचं काय गोपनीय असतं, असा सवालही पेडणेकर यांनी केला.

मी महापौरांची नाराजी बघायला बसली नाही. ज्या मुंबईकरांनी पत्रं दिली आहेत. त्या पत्रांची उकल आम्हाला हवी आहे. आमच्या पत्राला मार्चपासून उत्तरं दिली गेलेली नाहीत. नगरसेवकांच्या पत्राला जेव्हा उत्तर येत नाहीत, तेव्हा महापालिकेतील कर्मचारी हा कोणाच्या घरचा स्टाप नसतो. महापौरपदाचा मानसन्मान आम्हीही ठेवणार. पण तुमच्याकडून कामात कुचराई केली जात आहे, त्या पत्राबाबत पालिका सेक्रेटरी जे पीए म्हणून काम करतात, त्यांना याबाबत विचारलं, असेही पेडणेकर यांनी सांगितले.