Kunal Kamra Controversy : "शिंदेंचे नेते रेड्याचं पण दूध..."; कुणाल कामराची पाठराखण करताना राऊतांचा शिंदे गटावर हल्लाबोल

Mumbai News, 28 Mar : कॉमेडियन कुणाल कामरा (Kunal Kamra) याच्या एका गीतामुळे सध्या राज्यातील राजकीय वातावरण चांगलंच तापलं आहे. एकनाथ शिंदेंची शिवसेना कामरा याच्याविरोधात आक्रमक झाली आहे. तर ठाकरे गटासह विरोधक कामरा याची बाजू घेताना दिसत आहेत.

अशातच आता या सर्व प्रकरणावर प्रतिक्रिया देताना ठाकरेंच्या शिवसेनेचे खासदार संजय राऊत (Sanjay Raut) शिंदे गटावर हल्लाबोल केला आहे. तसंच अभिव्यक्ती स्वातंत्र्याचा नियम पाळला जावा, असंही राऊतांनी म्हटलं आहे. तर कुणाल कामरा याच्यावर हक्क भंग आणत त्याचे युट्यूब चॅनल तपासण्याची मागणी शिंदेंच्या शिवसेनेकडून करण्यात आली आहे.

यावर प्रतिक्रिया देताना संजय राऊत म्हणाले, शिंदे गटाचे नेते कोणतीही मागणी करू शकतात. शिंदे गटाला मागणी करायला काहीच जात नाही. ते रेड्याचे दूध काढू शकतात आणि ते बैलाचेही दूध काढू शकतात. पण मुळात या देशामध्ये अजूनही कायदा आहे आणि काही प्रमाणात आमच्या सारख्या लोकांनी या देशात स्वातंत्र्य टिकवलं आहे.

शिवाय तुमच्या विरोधात बोललं म्हणून एखाद्याचं चॅनेल बंद करायचं त्याला टायरमध्ये घालून मारायचं अशी भूमिका घेतली आणि उद्या उलटं झालं सरकार बदललं आणि तुमच्या विरोधातील लोकांनी अशीच भूमिका घेतली तर काय होईल? देशात अराजक माजेल असं म्हणत राऊतांनी शिंदे गटावर निशाणा साधला.

तसंच हा देश खूप मोठा आहे. पण शिंदे गटाला त्यांचा देश अमित शहा (Amit Shah) यांच्या पलिकडे दिसत नाही, असाही टोला राऊतांनी लगावला. शिवाय जोपर्यंत अमित शहा यांचे छत्र त्यांच्या डोक्यावर आहे, तोपर्यंत त्यांची अशी भाषा चालेल. पण रामकृष्ण ही गेले, तसे मोदी-शहा पण जातील-येतील इतके लक्षात ठेवा, असा इशारा देत. देशात कायद्याचे राज्य आहे. शिंदे गटाने कायद्याच्या मदतीने कारवाई करावी, असंही राऊत म्हणाले.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप