Video Mahadev Jankar News : 'बहिणी'ला विधानपरिषद, आता 'भाऊ' राज्यसभेवर जाणार का ? जानकरांचे मोठे संकेत, महायुतीचे टेन्शन वाढले

Mumbai News : भाजप नेत्या पंकजा मुंडे आणि रासपचे महादेव जानकरांचं बहीण- भावाचं नातं सर्वश्रुत आहे. पंकजा मुंडेंच्या संघर्षाच्या काळात त्यांच्या पाठीशी खंबीरपणे उभे राहत जानकर यांनी त्यांची बाजूही लावून धरली होती.पण या दोन्हीही नेत्यांना नुकत्याच पार पडलेल्या लोकसभा निवडणुकीत पराभव पत्करावा लागला होता. हा पराभव या बहीण भावाच्या चांगलाच जिव्हारी लागला आहे.

त्यापैकी पंकजा मुंडे (Pankaja Munde) यांना भाजपने विधानपरिषदेची उमेदवारी देत त्यांचं राजकीय पुनर्वसन केले आहे. पण याचवेळी दुसरीकडे त्यांचे 'भाऊ' महादेव जानकरांना भाजपने पुन्हा एकदा विधानपरिषदेची संधी नाकारली आहे.त्यामुळे जानकरांचं पुढं काय होणार अशी चर्चा राजकीय वर्तुळात जोर धरू लागली आहे. यावर खुद्द जानकरांनीच सूचक विधान केले आहे.

विधानपरिषदेची 11 जागांसाठीची निवडणूक येत्या 12 जुलैला होत आहे. या निवडणुकीसाठी भाजपकडून विधानपरिषदेच्या निवडणुकीसाठी जी काही दहा नावं फायनल केली होती. त्यात महादेव जानकरांचाही समावेश होता.पण पक्षश्रेष्ठींनी पंकजा मुंडे, सदाभाऊ खोत,परिणय फुके,योगेश टिळेकर आणि अमित गोरखे यांना संधी दिली. त्यामुळे जानकरांचा पत्ता कट झाला. पण तरीही त्यांनी उमेद हारलेली नाही. जानकरांनी पंकजा मुंडेंप्रमाणेच भाजपकडून आपलेही पुनर्वसन केले जाणार असल्याचे संकेत दिले आहे.

परभणी लोकसभा निवडणुकीत पराभव स्विकारावा लागल्यानंतर महादेव जानकरांनी आधी विधानपरिषद आणि नंतर राज्यसभेसाठी महायुतीकडे जॅक लावायला सुरुवात केली आहे.त्यांनी महायुतीकडून आपल्याला विधान परि्षद आणि राज्यसभेची एक- एक जागा देण्याचा शब्द देण्यात आल्याचं त्यांनी स्पष्ट करत शिंदे-फडणवीस- पवारांचं टेन्शन वाढवलं होतं.

मुंबईतील 'रासप' कार्यालयाच्या उद्घाटनासाठी महादेव जानकर (Mahadev Jankar) हे मुंबईत आले होते.यावेळी त्यांनी मीडियाशी संवाद साधला. जानकर यांनी यावेळी विधानपरिषदेची उमेदवारी मिळालेल्या पंकजा मुंडे यांचं अभिनंदन केलं आहे. बहीण पंकजा मुंडेंना विधानपरिषद मिळाली,आता भाऊ महादेव जानकर यांना राज्यसभेची उमेदवारी जाहीर होणार का अशी विचारणा त्यांना करण्यात आली. त्यावर जानकर यांनी मोठं विधान करत आगामी राजकीय निर्णयाचे संकेत दिले होते.

जानकर म्हणाले, पंकजा मुंडेंना विधानपरिषदेची उमेदवारी मिळाली. त्याबद्दल त्यांचं अभिनंदन. बहीण विधानपरिषदेवर आमदार झाल्यानंतर भाऊदेखील राज्यसभेवर नक्कीच जाणार आहे, असे ते म्हणाले आहेत. तसेच काळजी नाही असंही त्यांनी सांगितले.

जानकर नेमकं काय म्हणाले?

महादेव जानकर म्हणाले, माझे आणि देवेंद्र फडणवीस यांचे गेल्या 20 वर्षांपासून घरगुती संबंध आहेत.फडणवीस हे माझ्या भावाप्रमाणे आहेत.आपण त्यांच्या मंत्रिमंडळात मंत्री होतो हे सांगतानाच त्यांना आपल्या स्वभावाची माहिती असल्याचेही ते म्हणाले.महायुतीच्या एकनाथ शिंदे,देवेंद्र फडणवीस आणि अजित पवार या तीनही प्रमुख नेत्यांनी माझ्या पक्षाला एक जागा लोकसभेला दिली होती.त्यामुळे मी त्यांचे आभार मानतो. पण जनतेना माझ्याविरोधात कौल दिला आणि त्यात मी पराभूत झालो.हा पराभव आपण मान्य केल्याचेही जानकरांनी सांगितले.