Hitendra Thakur : तावडेंच्या आरोपांवर ठाकूर बरसले; म्हणाले, 'काल भिजलेल्या कोंबडीसारखे...' पाहा VIDEO

Mumbai News : भाजपचे राष्ट्रीय सचिव विनोद तावडे यांना मुंबई विरारमधील एका हॉटेलमध्ये पैसे वाटपाच्या आरोपांची राळ अजून काही खाली बसलेली नाही. विनोद तावडे यांनी गोंधळातून सुटका करून घेतल्यानंतर हितेंद्र ठाकूर यांच्यावर निशाणा साधला. त्यावर ठाकूर यांनी जोरदार प्रत्युत्तर दिले.

"विनोद तावडे काल भिजलेल्या कोंबडीसारखे हॉटेलमध्ये बसून होते. त्यांना मुंबईला गेल्यावर कंठ फुटला", असा टोला हितेंद्र ठाकूर यांनी तावडेंना लगावला.

मुंबईतील विरारमधील विवांत हॉटेलमध्ये भाजप नेते विनोद तावडे यांना बहुजन विकास आघाडीच्या कार्यकर्त्यांनी पैसे पकडल्याचा दावा आहे. भाजपचे (BJP) राष्ट्रीय नेते पैसे वाटताना पकडल्यावरून त्याचे पडसाद महाराष्ट्रासह देशात उमटले. भाजप महायुती या धक्क्यातून सावरू शकली नाही. यातून महाविकास आघाडी आणि महायुतीच्या नेत्यांमध्ये आरोपांच्या फैरी सुरू आहेत.

विनोद तावडे यांना बहुजन विकास आघाडीच्या कार्यकर्त्यांनी तब्बल तीन तास विवांत हॉटेलमध्ये रोखून ठरले होते. या गोंधळामुळे विनोद तावडे, उमेदवार राजन नाईक यांची चांगलीच कोंडी झाली. एकप्रकारे ते थिजले होते. हितेंद्र ठाकूर (Hitendra Thakur) यांचे पुत्र क्षितिज ठाकूर आणि त्यांचे कार्यकर्त्यांना शांत करत तेथून विनोद तावडे यांना बाहेर काढले. हितेंद्र ठाकूर आणि विनोद तावडे यांनी एकाच वाहनातून प्रवास केला.

हितेंद्र ठाकूर यांनी पत्रकार परिषद घेत, भाजपकडूनच ही टीप मिळाली होती की, विनोद तावडे पैसे वाटत आहेत. ठाकूर यांच्या आरोपामुळे भाजपमध्ये अधिकच गोंधळ उडाला. यातून सावरताना विनोद तावडे यांनी हितेंद्र ठाकूर यांच्यावर गंभीर आरोप केला. 'विवांत हॉटेल ठाकूर यांच्या आहे. त्यांनी गोंधळ घालण्याचे नियोजन केले होते', असा तावडेंनी आरोप केला.

तावडेंच्या या आरोपांवर हितेंद्र ठाकूर यांनी हल्लाबोल चढवला. ठाकूर म्हणाले, "ते हॉटेल तावडेंनीच माझ्या नावावर करावे. काल जे भिजलेल्या कोंबडीसारखे हॉटेलमध्ये बसून होते. त्यांना मुंबईला गेल्यावर कंठ फुटला". खोटं बोलायचं आणि ते रेटून बोलायचं ही त्यांची सवय आहे, असा टोला देखील ठाकूर यांनी लगावला.