Manoj Tiwari : ठाण्यातील सभेत अभिनेता मनोज तिवारी यांची तुफान फटकेबाजी

Thane News : अभिनेता तथा गायक मनोज तिवारी यांनी ठाणे इथल्या सभेत तुफान फटकेबाजी केली.

'महाराष्ट्राच्या विकासाठी पंतप्रधान नरेंद्र मोदी यांना डबल इंजिनची भेट द्याची आहे', असे मनोज तिवारी यांनी म्हटले. मनोज तिवारी ठाणे विधानसभा शहर मतदारसंघात आमदार संजय केळकर यांच्या प्रचार रॅलीत सहभागी झाले होते.

मनोज तिवारी म्हणाले, "आम्ही सिनेमा करतो, गाणी गातो, लोकांचे मनोरंजन करतो; मात्र आज आमचा सगळ्यात मोठा उद्देश आहे, की गरिबांना चांगले दिवस यावेत, मोदी (Narendra Modi) सरकारने काही समस्या सोडवल्या आहेत, काही सोडवायच्या आहेत. त्यासाठी आपल्या सर्वांना एकजूट होऊन राज्यात पुन्हा महायुतीचे सरकार आणायचे आहे. मोदींना डबल इंजिनची भेट द्यायची आहे".

'ठाणे शहर विधानसभेचे उमेदवार संजय केळकर सर्वसामान्यांमध्ये मिसळणारा माणूस आहे. इतर आमदारांनी पीए ठेवले आहेत; परंतु केळकर हे जनसेवक आहेत, ते थेट सर्वांना भेटतात. मतदानासाठी (Voter) मोठ्या संख्येने बाहेर पडा', असे आवाहनही मनोज तिवारी यांनी केले.

'महायुतीचे सरकार आल्यानंतर लाडक्या बहिणींसाठीची दिली जाणारी रक्कम ही 2100 रुपये केली जाणार आहे, सरकार आल्यावर भ्रष्टाचार समूळ नष्ट केला जाईल. आशासेविकांना 1500 रुपये दिले जाणार आहेत. भाजपवाले जे बोलतात ते करतात, हे यापूर्वीच्या निर्णयांवरूनदेखील दिसले आहे. त्यामुळे तुम्हालाही आता विश्वास दाखवून महायुतीला निवडून द्यायचे आहे', असे आवाहनही केले.

सहा ठिकाणी चौकसभा

गावदेवी मैदान, साडेसात वाजता अशोक टॉकीज, साडेआठ वाजता खारटण सिडको बस टॉप, खोपट, रुणवाल नगर, उथळसर नाका येथे या सभा घेतल्या गेल्या. यावेळी ठाणे भाजपचे उपाध्यक्ष विक्रम भोईर, दिशा प्रवीण रानडे, सह्याद्री प्रतिष्ठान संघटनेचे संस्थापक अध्यक्ष श्रमिक गोजमगुंडे, माजी नगरसेवक मिलिंद पाटणकर यांनी संबोधित केले.

ब्राह्मण समाजाचा पाठिंबा

संजय केळकर यांना विधानसभा निवडणुकीत तेली समाजासह नामदेव शिंपी समाजाने त्यांना पाठिंबा दिला आहे. तर, राज्याचे सध्याचे सामाजिक व राजकीय वातावरण पाहता हिंदुत्वाचा मुद्दा भाजप आणि मित्रपक्ष यांनी केंद्रस्थानी ठेवला आहे. ब्राह्मण समाजाचीदेखील हीच भूमिका असल्यामुळे हा पाठिंबा दिल्याचे पदाधिकाऱ्यांनी म्हटले आहे.