Ward-wise electoral roll Maharashtra : राज्यात सध्या नगरपंचायत व नगरपरिषदांच्या निवडणुकांसाठी जोरदार प्रचार सुरू आहे. पुढील काही दिवसांत महापालिकेच्या निवडणुकांचा कार्यक्रम जाहीर होईल. त्याआधी राज्य निवडणूक आयोगाकडून प्रभागनिहाय प्रारूप मतदारयाद्या प्रसिध्द करण्यात आल्या आहेत. आता त्यावर हरकती व सूचना किंवा तक्रारी मागविण्यात आल्या आहेत. पण हे करताना आयोगाने सातत्याने मतचोरीचा आरोप करणाऱ्या विरोधकांना शब्दांमध्ये गुंडाळले आहे.
महानगरपालिका निवडणुकीसाठी मतदारयाद्यांचे प्रभागनिहाय विभाजन संबंधित महानगरपालिका आयुक्त स्तरावर केले आहे. याबाबत काही हरकती व सूचना किंवा तक्रारी असल्यास 27 नोव्हेंबरपर्यंत संबंधित महानगरपालिकेत दाखल कराव्यात, असे आवाहन राज्य निवडणूक आयोगाकडून करण्यात आले आहे.
आयोगाने राज्यातील 29 महानगरपालिकांच्या निवडणुकांसाठी मतदार याद्यांकरिता 1 जुलै हा अधिसूचित दिनांक निश्चित केला आहे. त्यादिवशी अस्तित्वात असलेल्या विधानसभेच्या मतदारयाद्या या निवडणुकांसाठी वापरण्यात येणार आहेत. या मूळ मतदार याद्या भारत निवडणूक आयोगाने तयार केल्या आहेत.
प्रभागनिहाय विभाजन संबंधित महानगरपालिका स्तरावर महानगरपालिका आयुक्तांच्या देखरेखीखाली करण्यात आले आहे. त्यानुसार 20 नोव्हेंबर रोजी संबंधित महानगरपालिकेच्या ठिकाणी प्रभागनिहाय प्रारूप मतदारयाद्या प्रसिद्ध करण्यात आल्या आहेत. त्यातील मतदारांचे नाव https://mahasecvoterlist.in या संकेतस्थळावर पाहता येईल. त्यावर 27 नोव्हेंबरपर्यंत हरकती व सूचना दाखल करता येतील.
दरम्यान, विरोधकांकडून मतदारयाद्यांमधील घोळावरून सातत्याने मतचोरीचा आरोप केला जात आहे. काही दिवसांपूर्वीच सर्व विरोधी पक्षांच्या नेत्यांनी आयोगाच्या अधिकाऱ्यांची भेट घेत कथित घोळ दूर करण्याची मागणी केली होती. यापार्श्वभूमीवर महानगरपालिकांसाठी प्रारूप यादी प्रसिध्द झाल्यानंतर आयोगाने हरकती व सूचना किंवा तक्रारी पाठविण्याचे आवाहन करताना आपली भूमिका स्पष्ट केली आहे.
प्रभागनिहाय मतदार याद्या तयार करताना विधानसभा मतदारसंघाच्या यादीप्रमाणेच मतदार याद्यांमध्ये मतदारांची नावे व पत्ते कायम ठेवले जातात. प्रभागनिहाय मतदार याद्यांमध्ये नवीन नावांचा समावेश करणे, नावे वगळणे अथवा नावे किंवा पत्त्यांमध्ये दुरूस्ती करणे इ. स्वरूपाची कार्यवाही केली जात नाही, असे आयोगाकडून स्पष्ट करण्यात आले आहे. याबाबत विरोधकांकडून वारंवार आरोप केले जात आहेत.
मतदार याद्यांचे प्रभागनिहाय विभाजन करताना लेखनिकांकडून होणाऱ्या चुकांसंदर्भात, तसेच मतदाराचा चुकून प्रभाग बदलणे, विधानसभेच्या यादीत नाव असूनही प्रभागाच्या यादीत नाव नसणे आदींसंदर्भातील हरकती व सूचना महानगरपालिका आयुक्तांकडे दाखल करता येतील, असेही राज्य निवडणूक आयोगाने म्हटले आहे. असे करताना आयोगाने मतदारयाद्यांमध्ये चूका झाल्या असल्यास त्याची जबाबदारी लेखनिकांवर टाकली आहे. यामध्ये कोणताही घोळ नसेल, असेच आयोगाने एकप्रकारे विरोधकांना शांत करण्यासाठी सूचित केले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.