Manikrao Kokate: कोकाटेंचं क्रीडा खातं आता 'हा' बडा नेता सांभाळणार; महत्वाची अपडेट आली समोर

Manikrao Kokate: सरकारची फसवणूक प्रकरणात दोन वर्षांच्या तुरुंगवासाची शिक्षा झालेले आणि अटक वॉरंट निघालेले राष्ट्रवादी काँग्रेसचे नेते आणि मंत्री माणिकराव कोकाटे यांच्याकडून सर्व खाती काढून घेण्यात आली आहेत. पण अद्याप त्यांनी मंत्रीपदाचा राजीनामा दिलेला नाही. पण कोकाटेंना कुठल्याही क्षणी अटक होण्याची शक्यता असल्यानं त्यांचा मंत्रीपदाचा राजीनामा देखील येऊ शकतो. दरम्यान, कोकाटेंकडील सर्व खाती एका बड्या नेत्याकडं सोपवण्यात आली आहेत.

मुख्यमंत्री देवेंद्र फडणवीस यांनी यासंदर्भात राज्यपाल आचार्य देवव्रत यांना एक पत्र लिहिलं असून या पत्रात त्यांनी माणिकराव कोकाटे यांच्याकडील क्रीडा व युवक कल्याण मंत्रालय, अल्पसंख्यांक विकास आणि औकाफ (वक्फ) मंत्रालय ही तीन खाती काढून ती उपमुख्यमंत्री अजित पवार (अर्थ व नियोजन आणि राज्य उत्पादन शुल्क मंत्री) यांच्याकडं सोपवण्यात यावं. कोकाटेंना शिक्षेचा आदेश स्थानिक कोर्टानं दिल्यानंतर त्याच दिवशी १७ डिसेंबर २०२५ रोजी मुख्यमंत्र्यांनी राज्यपालांना हे पत्र लिहिलं आहे.

दरम्यान, पत्र मिळाल्यानंतर राज्यपाल देवव्रत यांनी कोकाटेंकडील खाती काढून घेण्यासाठी तात्काळ मंजुरी दिली. त्यामुळं माणिकराव कोकाटे हे अद्याप मंत्रीपदावर असले तरी ते आता बिनखात्याचे मंत्री असणार आहेत. पण १९ डिसेंबर २०२५ रोजी हायकोर्टात त्यांच्या अर्जावर सुनावणी पार पडल्यानंतर कोकाटेंचा राजीनामा घ्यायचा किंवा नाही यावर सरकारचा निर्णय होऊ शकतो. सध्या कोकाटे हे उपचारांसाठी रुग्णालयात दाखल झाले आहेत. त्यामुळं त्यांना अद्याप अटक झालेली नाही. नाशिक सत्र न्यायालायानं दोन वर्षांच्या शिक्षेचा आदेश रद्द करण्यात यावा यासाठी कोकाटेंनी हायकोर्टात अर्ज केला आहे.