Manoj Jarange: जरांगेंच्या आंदोलनामुळं आझाद मैदानाला छावणीचं स्वरुप! 1000 पोलीस कर्मचारी तैनात, CRPF च्या जवानांनाही पाचारण

Manoj Jarange: मराठा आरक्षणाच्या मागणीसाठी आंदोलक मनोज जरांगे हे उद्या मुंबईत दाखल होणार आहेत. इथं आझाद मैदानावर ते आंदोलन आणि उपोषण करणार आहेत, यासाठी मुंबई पोलिसांनी त्यांना केवळ एकाच दिवसाची परवानगी दिली आहे. पण दुसरीकडं जोपर्यंत आरक्षण जाहीर होत नाही तोवर आपण आंदोलनस्थळावरुन उठणार नाही अशी भूमिका जरांगेंनी मांडली आहे.

त्यामुळं या ठिकाणी जरांगेंचे समर्थक आणि पोलिसांमध्ये मोठा संघर्ष होण्याची शक्यता आहे. यापार्श्वभूमीवर मुंबईत रेड अलर्ट जाहीर करण्यात आला असून आझाद मैदानाच्या परिसरातच नव्हे तर शहरभर तब्बल १००० पोलिसांचा फौजफाटा तैनात करण्यात आला आहे. तसंच सीआरपीएफच्या तुकडीलाही पाचारण करण्यात आलं आहे.

जरांगेंच्या आंदोलनासाठी परवानगी देण्यासाठी काढलेल्या आदेशात म्हटलं की, २९ ऑगस्ट रोजी जरांगेंना आणि त्यांच्या समर्थकांना आझाद मैदानात आंदोलन करता येईल. पण हे आंदोलन केवळ एकाच दिवसासाठी अटीशर्तींनुसार करता येईल. त्यासाठी सकाळी ९ ते संध्याकाळी ६ वाजेपर्यंतची वेळ देण्यात आली आहे. यावेळेत ५००० आंदोलकांना या मैदानात परवानगी असेल.

पण त्यांना शहरामध्ये कुठलीही रॅली किंवा मिरवणूक काढता येणार नाही. तसंच त्यांना आंदोलनादरम्यान माईक आणि लाऊडस्पिकर्सही वापरता येणार नाहीत. त्याचबरोबर केवळ महत्वाच्या व्यक्तींसह पाचच वाहनांना आझाद मैदानापर्यंत प्रवेश असेल. याशिवाय जी वाहनं मुंबईत येतील ती वाडी बंदर जंक्शन इथं निश्चित करुन दिलेल्या जागीच पार्क करता येतील. संध्याकाळी सहा वाजल्यानंतर सर्व आंदोलकांना आझाद मैदान सोडावं लागेल. अशा अटी-शर्ती जरांगेंच्या आंदोलनसाठी घालण्यात आल्या आहेत.

दरम्यान, मुंबई हायकोर्टानं यापूर्वी जरांगेंना पोलिसांच्या परवानगीशिवाय आझाद मैदानात आंदोलन करण्यास मनाई केली होती. आझाद मैदानात आंदोलनाविरोधात अॅमी फाऊंडेशनच्यावतीनं हायकोर्टात याचिका दाखल करण्यात आली होती. यावर सुनावणी करताना कोर्टानं म्हटलं होतं की, जरांगेंना राज्यघटनेनुसार उपोषण आणि आंदोलन करण्याचा अधिकार आहे. त्यामुळं त्यांना आंदोलनपासून रोखता येणार नाही पण पोलीस परवानगीशिवाय त्यांना आंदोलन करता येणार नाही.

पण यावेळी कोर्टानं याचिकाकर्त्यांना देखील झापलं होतं. तुमच्या याचिकात जरांगेंना प्रतिवादी करण्यात आलेलं नाही त्यामुळं आम्ही त्यांना थेट कुठलेही आदेश देणार नाही. तसंच जोपर्यंत त्यांना प्रतिवादी न करता तुम्ही पुन्हा याचिका दाखल केली तर ती फेटाळली जाईल, असा स्पष्ट इशाराही दिला होता. यावेळी सरकारी वकिलांनी देखील बाजू मांडताना जरांगेंना नवी मुंबईत खारघर परिसरात आंदोलनासाठी मैदान उपलब्ध करुन दिलं जाईल, त्या ठिकाणी ते उपोषणाला बसू शकतात. यासाठी त्यांना सर्वतोपरी सोयी-सुविधा उपलब्ध करुन दिल्या जातील असंही सांगितलं होतं.