Manoj Jarange : मनोज जरांगेंना अखेर परवानगी मिळाली! आझाद मैदानात आंदोलन करता येणार; पण...

Manoj Jarange : मराठा आरक्षण आंदोलक मनोज जरांगे यांना अखेर मुंबईतील आझाद मैदानात आंदोलन करण्यासाठी पोलिसांनी परवानगी दिल्याचं वृत्त आहे. काही अटी-शर्तींसह त्यांना इथं आंदोलन करता येणार आहे. पण नेमकी किती दिवसांसाठी ही परवानगी असेल परवानगीसाठी दिलेल्या पत्रात नेमकं काय म्हटलंय? जाणून घेऊयात.

आंदोलनासाठी अटी-शर्ती काय?

टीव्ही न्यूजच्या माहितीनुसार, मुंबई पोलिसांकडून मनोज जरांगे यांना काही अटी-शर्तींसह आझाद मैदानात आंदोलनासाठी परवानगी देण्यात आली आहे. यामध्ये त्यांना एकाच दिवसासाठी सकाळी ९ ते संध्याकाळी ६ या वेळेत आंदोलन करता येणार आहे. तसंच केवळ ५ हजार लोकांना या आंदोलनात सहभागी होता येईल. त्यांना आंदोलनावेळी ध्वनीक्षेपकाचा वापर करता येणार नाही. गोंगाट करणाऱ्या उपकरणांचा देखील यावेळी आंदोलनस्थळी वापर करता येणार नाही. तसंच ठरवून दिलेल्या वेळेनंतर या मैदानात त्यांना थांबता येणार नाही.

जरागेंकडून स्वागत अन् इशारा

दरम्यान, पोलिसांच्या या परवानगीचं स्वतः मनोज जरांगे यांनी स्वागत केलं आहे. पण जर आंदोलनासाठी एकाच दिवसाची परवानगी दिली आहे तर सरकारनं आरक्षण पण एकाच दिवसांत देऊन टाकावं. अन्यथा आम्ही आंदोलनस्थळावरुन उठणार नाही, अशी भूमिका देखील त्यांनी मांडली आहे. तसंच यासंदर्भातील ऑर्डर वाचल्यानंतर आपण यावर सविस्तर बोलू असंही त्यांनी सांगितलं आहे. शिवनेरी गडावर पोहोचल्यानंतर संध्याकाळी माध्यमांशी आपली सविस्तर भूमिका मांडेन असं जरांगे यांनी सांगितलं. तसंच मराठे अडमुठी भूमिका घेणार नाही शंभऱ टक्के कायद्याचं पालन करणार असंही त्यांनी यावेळी स्पष्ट केलं.