Avinash Jadhav Arrest: मोर्चापूर्वी मनसे जिल्हाप्रमुख अविनाश जाधव यांना पोलिसांनी पहाटेच घेतलं ताब्यात

MNS Avinash Jadhav Arrest: मराठी माणसांवर होत असलेल्या अन्यायाला विरोध करण्यासाठी सर्व मराठी संघटना, राजकीय पक्षातील मराठी पदाधिकारी, कार्यकर्ते आणि मराठी समाज मोठ्या संख्येने एकत्र आले आहेत. अमराठी व्यापाऱ्यांनी मोर्चा काढून शक्तीप्रदर्शन केले होते, याला सडेतोड उत्तर देण्यासाठी मनसेने आक्रमक झाली आहे.

मनसेकडून आज मीरा भाईंदरमध्ये मोर्चाचे आयोजन करण्यात आले होते. मोर्चापूर्वी ठाणे-पालघर जिल्हाप्रमुख अविनाथ जाधव यांना पोलिसांनी पहाटे तीन वाजण्याच्या सुमारास ताब्यात घेतले आहे. काश्मिरा पोलिस ठाण्यात त्यांना थांबवून ठेवण्यात आले आहे. मराठी बांधवांना या मोर्चासाठी मोठ्या संख्येने जमण्याचे आवाहन जाधव यांनी केले होते. पोलिसांनी अविनाश जाधव यांना नोटीस बजावली होती.

मीरा-भाईंदर शहरात शहरात मराठी भाषेला दुय्यम स्थान देणे, मराठी व्यक्तींना घर देण्यास नकार देणे, तसेच विशिष्ट समाजाच्या नावाने शहरात तेढ निर्माण करण्याचे प्रकार सातत्याने घडत असल्यामुळे मराठी जनतेत तीव्र असंतोष आहे, याला विरोध करण्यासाठी हा मोर्चा काढला जात असल्याचे मनसैनिकांचे म्हणणं आहे.

या मोर्चाला पोलिसांनी परवानगी नाकारली आहे, तरीही मोर्चावर अविनाश जाधव ठाम होते. "मराठी आमची आई आहे, आईसाठी कोणताही गुन्हा घेण्यासाठी आम्ही तयार आहोत. कोणत्याही दबावाला बळी पडणार नाही. हा मोर्चा नियोजित वेळेवर आणि ठिकाणी निघणारच, असा निर्धार अविनाश जाधव यांनी व्यक्त केला होता.

जाधव यांच्या अटकेनंतर मराठी जनतेच्या अभिव्यक्ती स्वातंत्र्यावरही गदा आणली जात आहे. पोलिस सत्ताधाऱ्यांच्या दबावाखाली काम करीत असल्याचा आरोप मनसेने केला आहे. मोर्चापूर्वीच वसई आणि विरारमधील मनसेच्या पदाधिकाऱ्यांची पोलिसांनी धरपकड सुरु केली आहे. पण मोर्चा निघणारच असे मनसेकडून सांगण्यात आले आहे. हा मोर्चा आज सकाळी 10 वाजता बालाजी हॉटेलपासून सुरू होणार असून, मिरा रोड स्टेशन परिसरात त्याची सांगता होणार आहे.