MNS : 'मला डावललं जातयं' म्हणणाऱ्या वसंत मोरेंची नाराजी दूर होईल का?

पुणे : मनसेचे अध्यक्ष राज ठाकरे यांचे कट्टर समर्थक वसंत मोरे यांना पुणे मनसे (mns) शहराध्यक्ष पदावरुन हटवल्यानंतर साईनाथ बाबर यांना शहराध्यक्ष करण्यात आले आहे. काही दिवसापासून पुण्यातील कार्यकर्त्यांवर वसंत मोरे (vasant more) नाराज असल्याची चर्चा आहे. (Vasant More News)

येत्या शनिवारी मुंबईत मनसेच्या पदाधिकाऱ्यांची बैठक आहे. या बैठकीला वसंत मोरे उपस्थित राहणार आहेत. या बैठकीत मोरे आपली खंत मांडणार का, त्यांची नाराजी दूर होणार का, याकडे सगळ्याचे लक्ष लागलं आहे. (Pune Latest Marathi News)

मुंबईतील रंग शारदा सभागृहात शनिवारी होणाऱ्या मनसेचे होणाऱ्या बैठकीस राज ठाकरे (raj thackeray) उपस्थित राहणार असल्याची शक्यता आहे. पुण्यातून मनसे नेते बाबू वागस्कर, शहराध्यक्ष साईनाथ बाबर, सरचिटणीस अजय शिंदे, हेमंत संभूस, गणेश सातपुते हे देखील उपस्थित राहणार आहेत.

मनसेचे पु्ण्यातील काही कार्यकर्ते वसंत मोरे यांच्यावर नाराज असल्याचे दिसते. "मला डावललं जातयं," अशी प्रतिक्रिया मोरे यांनी नुकतीच दिली होती. पुण्यात नुकतीच राज ठाकरे यांची सभा झाली. यावेळी त्यांना "तुम्ही अजूनही नाराज आहात का?" असा प्रश्न पत्रकारांनी विचारला होता. त्यावेळी वसंत मोरे यांनी हसत यावर प्रतिक्रिया दिली होती. ते म्हणाले होते की, "घरातील भांडण आहेत, ती बसून मिटवायचे असे कुणाला वाटत असेल तर बसून ते सर्व मिटेल, नाराज असण्याचे काही कारण नाही," मी शेवटपर्यंत राजमार्गावरच राहणार,असेही मोरे म्हणाले होते.

राज ठाकरे यांच्या पुण्यातील सभेत वसंत मोरे बोलतील, अशी कार्यकर्त्यांची अपेक्षा होती, पण त्यांचे भाषण झाले नाही. त्यानंतर मोरेंनी 'तात्या' (वसंत मोरे) योग्य वेळी बोलतात आणि सर्व त्याचे ऐकतात, असे म्हटलं होतं. त्यानंतर आता शनिवारी होणाऱ्या बैठकीत ते काय बोलणार, याबाबत कार्यकर्त्यांमध्ये उत्सुकता आहे.