Jayashree Shewale : शिंदे गटाचे खासदार राहुल शेवाळे यांना मातृशोक

Mumbai News : शिवसेना शिंदे गटातील खासदार राहुल रमेश शेवाळे यांच्या मातोश्री जयश्री रमेश शेवाळे (वय ७३) यांचे रविवारी (ता.19) सायंकाळी आठ वाजता मानखुर्द येथील राहत्या घरी निधन झाले.

आज (सोमवारी) दुपारी १२ वाजता त्यांच्या पार्थिवावर ट्रॉम्बे कोळीवाडा येथील हिंदू स्मशानभूमीत अंत्यसंस्कार करण्यात येणार आहेत. प्रकृती बिघडल्यामुळे गेल्या काही दिवसांपूर्वी त्यांना रुग्णालयात दाखल करण्यात आले होते.

उपचारांनंतर त्यांना गुरुवारी डिस्चार्ज देण्यात आला होता. त्यानंतर त्या घरीच होत्या. रविवारी सायंकाळी राहत्या घरी त्यांना हृदयविकाराचा झटका आला. त्यांना तातडीने त्यांना चेंबूरच्या एका खासगी रुग्णालयात दाखल करण्यात आले, पण उपचारापूर्वीच डॉक्टरांनी त्यांना मृत घोषित केले.

त्यांच्या मागे अविनाश शेवाळे, नवीन शेवाळे आणि खासदार राहुल शेवाळे अशी तीन मुले, वर्षा अविनाश शेवाळे, माजी नगरसेविका वैशाली नवीन शेवाळे, माजी नगरसेविका कामिनी राहुल शेवाळे या तीन सूना आणि सहा नातवंडे असा परिवार आहे.