Mumbai News, 22 Jan : मुंबई महानगरपालिका निवडणुकीच्या निकालात भारतीय जनता पक्षाने 89 जागा जिंकल्या आहेत. तर भाजप नंतर ठाकरेंच्या शिवसेनेचे 65 उमेदवार विजयी झाले आहेत. एकीकडे महापालिकेचा निकाल जाहीर होऊन सहा झाले तरी अद्याप महापौरपद कोणत्या पक्षाकडे जाणार याबाबतची माहिती अद्याप समोर आलेली नाही.
तर दुसरीकडे भाजपला आपला महापौर करायचा असेल तर शिंदेंचा पाठिंबा लागणार आहे. मात्र, शिंदेंनी या निवडणुकीआधी आपले नगरसेवक एका हॉटेलमध्ये ठेवल्यामुळे शिंदेंही महापौरपदावर दावा करणार असल्याच्या चर्चा सुरू झाल्या आहेत.
अशातच ठाकरेंच्या शिवसेनेच्या प्रभाग क्रमांक 157 च्या नगरसेविका डॉ.सरिता म्हस्के अचानक नॉट रिचेबल झाल्याने एकच खळबळ उडाली होती. ठाकरेंच्या शिवसेनेकडून विजयी झालेल्या सरिता म्हस्केंनी उद्धव ठाकरेंची साथ सोडली की काय? अशा चर्चाही सुरू झाल्या होत्या. मात्र, आता अखेर या सर्व चर्चांना पूर्णविराम मिळाला आहे.
कारण अखेर सरिता म्हस्के समोर आल्या असून त्यांनी उद्धव ठाकरेंची भेट घेतली आहे. अशातच माध्यमांशी बोलताना म्हस्के यांनी शिंदेंच्या शिवसेनेच्या नेत्यावर खळबळजनक आरोप केला आहे. महापालिकेच्या निवडणुकीत विजयी झाल्यानंतर शिंदेंच्या एका बड्या नेत्याने राजकीय स्वार्थासाठी माझ्या अपहरणाचा प्रयत्न केल्याचा आरोप त्यांनी केला.
शिवाय या नेत्याला हुलकावणी देऊन मी नवस फेडण्यासाठी तुळजापूरला गेले होते. त्यावेळी मोबाइलला रेंज नसल्यामुळे माझ्याशी कोणाचा संपर्क होऊ शकला नाही. मात्र, मुंबईतील गोंधळ समजताच मी आमदार मिलिंद नार्वेकर यांच्याशी संपर्क केला आणि त्यांची भेट घेतल्याचं म्हस्के यांनी सांगितलं.
म्हस्के यांच्या या दाव्यामुळे आता शिंदेंच्या नेमकं कोणत्या नेत्यांनी त्यांच्या अपहरणाचा प्रयत्न केला होता? अशा चर्चांना उधाण आलं आहे. शिवाय या आरोपांवर आता शिंदेंची शिवसेना काय स्पष्टीकरण देणार हे पाहणं देखील महत्त्वाचं ठरणार आहे.
महापौर पदाच्या निवडणुकीसंदर्भात घडामोडी घडत असतानाच ठाकरेंची शिवसेना पक्षाच्या गटस्थापनेसाठी 65 पैकी 64 नगरसेवक कोकण भवनात पोहोचले होते. मात्र यावेळी सरिता म्हस्के गैरहजर होत्या. शिवाय त्यांना फोन करण्याचा प्रयत्न केला तर त्यांना फोनही लाग नव्हता. त्यामुळे त्या नॉट रिचेबल झाल्याच्या चर्चांना उधाण आलं होतं.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.