राणा दाम्पत्यावरील राजद्रोहाच्या गुन्ह्यात ठाकरे सरकार अडचणीत : न्यायालयाने फटकारले

Ravi Rana | Navneet Rana | Sedition law

मुंबई : न्यायालयीन कोठडीत असलेल्या खासदार नवनीत राणा (Navneet Rana) आणि आमदार रवी राणा (Ravi Rana) यांना मुंबई सत्र बुधवार (४ मे) न्यायालयाने जामीन मंजूर केला आहे. गुरूवारी सकाळी जामिनाची सर्व प्रक्रिया पूर्ण झाल्यानंतर राणा दाम्पत्याला तुरुंगातून सोडण्यात आले आहे. मागील तेरा दिवसांपासून दोघेही तुरुंगात होते. दोघांनाही राजद्रोहाच्या गुन्ह्यात अटक करण्यात आली होती. न्यायालयाने त्यांना चौदा दिवसांची न्यायालयीन कोठडी सुनावली होती. (Navneet Rana Latest News)

दरम्यान, प्रथमदर्शनी राणा दाम्पत्यावरील हे राजद्रोहाचे कलमच चुकीचे असल्याचे मत मुंबई सत्र न्यायालयाने नोंदविले आहे. तसेच राज्य सरकार आणि मुंबई पोलिसांनाही न्यायालयाने फटकारले आहे. न्यायमुर्ती राहुल रोकडे यांनी दिलेल्या जामीन निकालाची प्रत नुकतीच उपलब्ध झाली आहे. याच निकालात न्यायालयाने राजद्रोहाच्या कलमावरुन राज्य सरकार आणि मुंबई पोलिसांवर ताशेरे ओढले आहेत. (Ravi Rana Latest News)

न्यायालयाने आपल्या निकालात काही निरीक्षण नोंंदवले आहेत. अशाप्रकारे एखाद्यावर थेट राजद्रोहाचा आरोप करणे चुकीचे आहे आणि या प्रकरणात १२४ अ कलम लागू होत नाही. तसेच पोलिसांनी राणा दाम्पत्याला नोटीस दिल्यानंतर त्यांनी आपले खार येथील निवासस्थान सोडले नव्हते आणि त्यांनी आपले आंदोलन देखील मागे घेतले होते. त्यानंतर अशा प्रकारे एखाद्यावर गुन्हा दाखल करणे चुकीचे आहे असे मत नोंदवण्यात आले आहे. (Matoshree And Shivsena)

तसेच असे कोणतेही पुरावे उपलब्ध नाहीत ज्यात राणा दाम्पत्यांनी आपले आंदोलन करतेवेळी कोणाला मातोश्रीबाहेर बोलवून घेतले होते, किंवा त्यांच्या एखाद्या वक्तव्यामुळे हिंसा निर्माण झाली आहे. त्यामुळे मुंबई पोलिसांनी राणा दाम्पत्यावर दाखल केलेले कलम चुकीचे आहे. त्यामुळे आम्ही या दोघांना जामिन मंजूर करत आहे, असेही न्यायालयाने सांगितले. त्यामुळे आता राणा दाम्पत्यावरील हे कलम रद्द होण्याची शक्यता आहे. मात्र अद्याप न्यायालयाने त्याबाबतचे कोणतेही आदेश दिलेले नाहीत.