NCP News : पुण्यानंतर आता ठाण्यात दोन राष्ट्रवादींची 'दिलजमाई'; एकनाथ शिंदेंचं टेन्शन वाढणार?

Thane News : आगामी काळात होत असलेल्या महापालिका निवडणुकीच्या पार्श्वभूमीवर घडामोडीला वेग आला आहे. उमेदवारी अर्ज दाखल करण्यास पाच दिवसाचा कालावधी शिल्लक राहिला आहे. त्यातच आता एकमेकांच्या पक्षासोबत युती करण्याकडे सर्वच पक्षाचा कला दिसत आहे.

बुधवारी उद्धव ठाकरे यांची शिवसेना व राज ठाकरेंची मनसे एकत्र येणार असल्याची घोषणा झाल्यानंतर आता अजित पवार यांच्या राष्ट्रवादी काँग्रेसने पुणे व पिंपरी चिंचवडमध्ये शरद पवार यांच्या राष्ट्रवादी काँग्रेसोबत युती करण्याचा निर्णय घेतला आहे. त्यातच आता ठाण्यात दोन राष्ट्रवादींनी एकत्रित येण्याबाबत चाचपणी सुरु केली असून त्यामुळे आता उपमुख्यमंत्री एकनाथ एकनाथ शिंदेंचं टेन्शन वाढणार आहे.

पुण्यात दोन्ही राष्ट्रवादी काँग्रेस (NCP) एकत्र येण्याच्या चर्चा सुरु आहेत. दरम्यान दोन्ही राष्ट्रवादी एकत्र येणार का? हे गूढ कायम आहे. त्यातच जागावाटपाबाबत चर्चा सुरु असल्याचे समजते. त्यामुळे काय होणार याकडे सर्वांचे लक्ष लागले आहे.

ठाण्यातील अजित पवार यांच्या राष्ट्रवादीचे नजीब मुल्ला आणि शरद पवारांच्या राष्ट्रवादीचे जितेंद्र आव्हाड हे कट्टर विरोधक मानले जातात. मुंब्रा-कळवा विधानसभा मतदारसंघातून नजीब मुल्ला यांनी जितेंद्र आव्हाड यांच्याविरोधात महायुतीतून निवडणूक लढवली होती. आता त्या ठाण्यात दोन्ही राष्ट्रवादी पुन्हा एकत्र येण्यासाठी हालचाली सुरू असल्याचे समजते.

आता ठाण्यात महापालिका निवडणुकीसाठी दोन्ही राष्ट्रवादी एकत्र येण्याची चिन्ह दिसत आहेत. अशातच राष्ट्रवादी ठाणे जिल्हा अध्यक्ष नजीब मुल्ला म्हणाले, "जितेंद्र आव्हाड (Jitendra Awahad) आमचे दुश्मन नाहीत. 30 तारखेपर्यंत जर आम्हाला कोणाचा प्रस्ताव आला तर आम्ही तो पक्षश्रेष्ठींकडे पाठवणार आणि विचार करणार. शेवटी कार्यकर्त्यांना निवडून आणायचे आहे." असे राष्ट्रवादी ठाणे जिल्हा अध्यक्ष नजीब मुल्ला यांनी स्पष्ट केले.

आगामी काळात होत असलेल्या निवडणुकीनंतर ठाणे शहरात जर पक्ष वाढवायचा असेल तर त्यांनी आता विचार करावा, असे सूचक वक्तव्य नजीब मुल्ला यांनी केले. त्यामुळे ठाण्यातील शरद पवार गट देखील आता एक पाऊल पुढे टाकून अजित पवार गटासोबत युतीचा विचार करणार का? असा प्रश्न विचारला जात आहे

दरम्यान, मनसेनंतर दोन्ही राष्ट्रवादी एकत्र आल्याने राज्यातील महापालिकांवर कोणत्या पक्षाचा विजयाचा झेंडा रोवणार हे पाहणे महत्त्वाचे ठरणार आहे. अजित पवार यांच्या राष्ट्रवादी काँग्रेसने पुणे व पिंपरी चिंचवडमध्ये शरद पवार यांच्या राष्ट्रवादी काँग्रेसोबत युती करण्याचा निर्णय घेतला आहे. त्यातच आता ठाण्यात दोन राष्ट्रवादींनी एकत्रित येण्याबाबत चाचपणी सुरु केली असून त्यामुळे आता उपमुख्यमंत्री एकनाथ एकनाथ शिंदेंचं टेन्शन वाढणार आहे.