Kolhapur Band News: कोल्हापूर प्रकरणात अधिक खोलात जावं लागेल; फडणवीस म्हणाले, 'विरोधीपक्षातील नेत्याने ..'

Devendra Fadnavis On Kolhapur Bandh : अहमदनगरपाठोपाठ कोल्हापुरातही औरंगजेबाच्या (Aurangzeb) फोटोवरून राडा झाला आहे. शिवराज्याभिषेक दिनाच्या (Shivrajyabhishek Din) पार्श्वभूमीवर मुस्लीम तरुणांनी औरंगजेबाचं स्टेटस ठेवल्यानं ही वादाची ठिणगी पेटली. याप्रकरणी हिंदुत्ववादी संघटनांनी आज (बुधवारी) कोल्हापूर (Kolhapur) बंदची हाक दिली आहे.

यावर उपमुख्यमंत्री देवेंद्र फडणवीस यांनी या समाजघटकांना इशारा दिला. "असलं धार्मिक उदातीकरण खपवून घेणार नाही. कोल्हापूर प्रकरणात अधिक खोलात जावं लागलं," असे फडणवीस म्हणाले.

मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी आज नवी मुंबई विमानतळाची पाहणी केली. त्यानंतर ते पत्रकारांशी बोलत होते. "हे विमानतळ २०२४ पर्यंत पूर्ण होईल," असे मुख्यमंत्री शिंदे यांनी सांगितले.

कोल्हापुरात विरोधीपक्षातील एका नेत्याने काहीतरी घडणार असल्याचे सांगितले होते, त्यामुळे या प्रकरणाशी त्यांचा काही संबध आहे का, हे तपासण्यास येईल, असे फडणवीस म्हणाले.

मंगळवारी आक्रमक झालेल्या हिंदुत्ववादी संघटनांनी कोल्हापुरातील दसरा चौक, टाऊन हॉटल, लक्ष्मीपुरी परिसरात दगडफेक केली. शिवाय आक्रमक हिंदुत्ववादी संघटनांनी शाहुपुरी पोलीस ठाण्यासमोर आंदोलनही केलं.

या कार्यकर्त्यांना पांगवण्यासाठी पोलिसांना लाठीमार करावा लागला. याप्रकरणी हिंदुत्ववादी संघटनांनी आज बंद पुकारला आहे. या प्रकरणाचा योग्य तो तपास सुरु आहे, असे फडणवीस म्हणाले.

शिवराज्यभिषेक दिनी कोल्हापुरात (Kolhapur News) सात तरुणांनी आक्षेपार्ह व्हाॅट्सअॅप स्टेट्स ठेवल्याने संतप्त पडसाद उमटले. या घटनेनंतर कोल्हापुरातील हिंदुत्ववादी संघटनांनी आक्रमक सबंधित तरुणांविरोधात कारवाई करण्यासाठी आक्रमक पवित्रा घेतला. त्यांनी लक्ष्मीपुरी आणि शाहूपुरी पोलीस ठाण्यासमोर ठिय्या धरला. मंगळवारी (6 जून) दुपारी झालेला हा प्रकार रात्री उशिरापर्यंत सुरु होता.