Bharat Jodo Yatra : 'भारत जोडो'च्या समारोपाकडे राष्ट्रवादी-शिवसेनेची पाठ; पटोले, चव्हणांचीही अनुपस्थिती

Congress : काँग्रेस नेते आणि राहुल गांधी यांच्या नेतृत्वाखाली सुरू झालेल्या ‘भारत जोडो यात्रे’चा आज काश्मीरमध्ये समारोप झाला. या समारोपाच्या कार्यक्रमावेळी येथे मोठ्या प्रमाणात बर्फवृष्टी होत असतानाही राहुल गांधींनी जोरदार भाषण केलं.

तर या ‘भारत जोडो यात्रे’च्या समारोपाच्या कार्यक्रमासाठी देशातील विविध पक्षाच्या नेत्यांना काँग्रेसच्यावतीने निमंत्रण देण्यात आले होते. मात्र, या यात्रेच्या समारोपाच्या कार्यक्रमाला महाराष्ट्रातील काँग्रेसच्या प्रमुख नेत्यांसह राष्ट्रवादी आणि शिवसेनेच्या नेत्यांनीही पाठ फिरवली असल्याचे समोर आले आहे.

एकीकडे महाराष्ट्रात राहुल गांधींच्या भारत जोडो यात्रेला प्रचंड प्रतिसाद मिळला. तर दुसरीकडे मात्र, यात्रेच्या समारोपाला राज्यातील काँग्रेसच्या प्रमुख नेत्यांसह महाविकास आघाडीतील पक्षांच्या नेत्यांनीच पाठ फिरवली. त्यामुळे महाराष्ट्रातील महाविकास आघाडीचे (Mahavikas Aghadi) अस्तित्व धोक्यात तर आले नाही ना? असा सवाल आता राजकीय वर्तुळात उपस्थित केला जात आहे.

‘भारत जोडो यात्रे’च्या समारोपाला महाराष्ट्रातील काँग्रेस नेते पृथ्वीराज चव्हाण, माणिकराव ठाकरे, मुकुल वासनिक, अविनाश पांडे, विश्वजीत कदम, प्रणिती शिंदे उपस्थित होते. तर काँग्रेसचे प्रदेशाध्यक्ष नाना पटोले हे श्रीनगरमध्ये असूनही कार्यक्रमाला गैरहजर होते.

या यात्रेच्या समारोपाला काँग्रेसचे नेते बाळासाहेब थोरात, काँग्रेसचे नेते आणि माजी मुख्यमंत्री अशोक चव्हाण (Ashok Chavan) हे अनुपस्थित होते. या बरोबरच राष्ट्रवादी आणि शिवसेनेच्या नेत्यांनीही याकडे पाठ फिरवली. तर बाळासाहेब थोरात हे आजारी असल्याने कार्यक्रमाला गेले नसल्याचे बोलले जात आहे.

दरम्यान, काँग्रेसकडून आघाडीतील पक्षांना निमंत्रणही देण्यात आलं होतं. मात्र, तरीही राष्ट्रवादी आणि शिवसेनेच्या नेत्यांनी कार्यक्रमाकडे पाठ फिरवल्यामुळे महाराष्ट्रातील महाविकास आघाडीचे अस्तित्व धोक्यात असल्याची चर्चा आहे. तर काँग्रेसच्या या ‘भारत जोडो यात्रेचा प्रवास आज तब्बल १३५ दिवसांनी थांबला आहे.