Nitesh Rane : कट्टर विरोधक नितेश राणे संजय राऊतांसाठी भावूक, अवघ्या सहा शब्दांत दिल्या सदिच्छा!

Nitesh Rane News : मंत्री नितेश राणे हे खासदार संजय राऊतांचे कट्टर विरोधक संजय राजाराम राऊत असे म्हणत ते टीका करत असतात. नितेश राणे यांच्या विरोधात संजय राऊतांनी मानहानीचे दावे देखील कोर्टात दाखल केले आहेत. दरम्यान, संजय राऊत यांनी आपल्या प्रकृतीत गंभीर स्वरुपाचा बिघाड झाला असून आपल्यावर उपचार सुरू असल्याचे सांगितले होते. राऊत हे प्रकृतीच्या कारणामुळे महाविकास आघाडी-मनसेच्या मोर्च्यात देखील सहभागी झाले नव्हते.

संजय राऊत यांच्या प्रकृतीची माहिती मिळताच त्यांचे कट्टर विरोधक नितेश राणे यांनी ट्विट करत 'संजय राऊतजी काळजी घ्या लवकर बरे व्हा!' अशा शुभेच्छा दिल्या आहेत. राणेंच्या या ट्विटमुळे अनेकांच्या भुवया उंचावल्या आहेत.

संजय राऊत यांनी आपल्या प्रकृतीविषयी ट्विट करत सांगितले होते की, आपण सगळ्यांनी कायम माझ्यावर विश्वास ठेवला आणि प्रेम केले. पण सध्या अचानक माझ्या प्रकृतीत गंभीर स्वरुपाचे बिघाड झाल्याचे समोर आले आहे. उपचार सुरू आहे मी यातून लवकरच बाहेर येईल.

वैद्यकीय सल्ल्यानुसार मला बाहेर आणि गर्दीत मिसळणे यावर निर्बंध घालण्यात आले आहेत. त्यास नाईलास आहे. मला खात्री आहे मी ठणठणीत बरा होऊन साधारणन नवीन वर्षात आपल्या भेटीस येईल, असे देखील राऊत यांनी म्हटले आहे.

पंतप्रधान नरेंद्र मोदी यांनी देखील ट्विट करत संजय राऊत हे लवकरच बरे व्हावेत यासाठी त्यांनी सदिच्छा दिल्या आहेत. तर, आदित्य ठाकरे यांनी देखील काळजी घे संजय काका,प्रत्येक संकटाच्या डोळ्यात डोळे घालून तू लढतोस आणि जिंकतोस! आत्ताही तेच होईल, खात्री आहे, असे म्हणत लवकरच बरे होण्यासाठी संजय राऊत यांना सदिच्छा दिल्या आहेत.