Harshvardhan Sapkal : वराह जयंती साजरी करण्याची मागणी हा सत्ताधाऱ्यांचा अजेंडा; हर्षवर्धन सपकाळ यांचा गंभीर आरोप

Varaha Jayanti controversy : भाजप नेते तथा राज्याचे मंत्री नितेश राणे यांनी राज्यभरात वराह जयंती साजरी करावी अशी मागणी मुख्यमंत्री देवेंद्र फडणवीस यांच्याकडे पत्राद्वारे केली आहे. त्यांच्या या मागणीमुळे आता राजकीय वातावरण चांगलंच तापलं आहे.

विरोधकांनी या मागणीवरून नितेश राणेंवर जोरदार टीका करायला सुरूवात केली आहे. अशातच आता महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी वराह जयंती साजरी करणं हा तरुणांचे लक्ष दुसरीकडे वळवण्यासाठीचा अजेंडा असल्याचा आरोप केला आहे.

राणेंच्या वराह जयंती साजरी करण्याच्या मागणीवर प्रतिक्रिया देताना हर्षवर्धन सपकाळ म्हणाले, "राज्यात अनेक ज्वलंत प्रश्न आहेत. कावड यात्रा ही देशासाठी आणि महाराष्ट्राला काही नवीन नाही पण आता वराह जयंती साजरा करण्याची मागणी सत्ताधारी लोक करत असतील तर ते संतापजनक आणि निषेधार्ह आहे. ही मागणी करणं म्हणजे तरुणांचे लक्ष दुसरीकडे वळवण्यासाठीचा हा त्यांचा अजेंडा आहे."

दरम्यान, ठाकरेंच्या शिवसेनेच्या नेत्या सुषमा अंधारे यांनी देखील राणेंच्या या मागणीवरून खोचक टोला लगावला आहे. वराह जयंतीच्या निमित्ताने नितेश राणे आणि त्यांच्या सर्व अनुयायांना लक्ष लक्ष शुभेच्छा.

नितेश राणे आणि त्यांच्या अनुयायांनी वराह जयंती वराह अवतारात साजरी करावी. नितेश राणे कायम जरी बडबडत असले तरी त्यांची विधानं अत्यंत महत्त्वाची असतात, ती गांभीर्याने घेतली पाहिजे. आपल्याला जरी विसर पडला असला तरी राणेंना पूर्वजांचा विसर पडला नाही, ही अत्यंत चांगली गोष्ट आहे.

दहीहंडी उत्सवात ज्याप्रमाणे गोविंदांच्या टोळ्या वावरतात, अगदी तसं वराह जयंती दिनी राणे आणि त्यांच्या समर्थकांनी वराह अवतारात संपूर्ण दिवस काढायला हवा, तेव्हाच खऱ्या अर्थाने वराह जयंती साजरी होईल, असा टोला त्यांनी राणेंना लगावला आहे.