Raj Thackeray Reaction : धनुष्यबाण शिंदेंना मिळाल्यानंतर राज ठाकरेंची प्रतिक्रिया : ‘पैसा येतो आणि जातो... नाव जपा... मोठं करा’

मुंबई : मुख्यमंत्री एकनाथ शिंदे (Eknath Shinde) यांच्या गटाला शिवसेना (Shivsena) आणि धनुष्यबाण हे चिन्ह मिळाले आहे. त्यानंतर राजकीय क्षेत्रातून विविध प्रतिक्रिया येत आहेत. आता ठाकरे घराण्यातील महाराष्ट्र नवनिर्माण सेनेचे अध्यक्ष राज ठाकरे (Raj Thackeray) यांचीही प्रतिक्रिया आली आहे. बाळासाहेब ठाकरे (Balasaheb Thackeray) यांच्या आवाजातील एक व्हिडिओ ट्विट करत त्यांनी अप्रत्यक्षपणे उद्धव ठाकरे यांच्यावर निशाणा साधला आहे. (Raj Thackeray's reaction after receiving a bow from Chief Minister Eknath Shinde's group)

राज ठाकरे यांनी आपल्या ट्विटमध्ये म्हटले आहे की, बाळासाहेबांनी दिलेला ‘शिवसेना’ हा विचार किती अचूक होता, ते आज पुन्हा एकदा कळलं. राज यांना याबरोबरच एक व्हिडिओही ट्विट केला आहे. त्यात म्हटले आहे की, नाव आणि पैसा... पैसा येतो, पैसा जातो...पुन्हा येतो...पण एकदा का नाव गेलं की परत येत नाही... ते येऊ शकत नाही. काळ्या बाजारासुद्धा मिळायचं नाही.... म्हणून नावाला जपा... नाव मोठं करा, असा तो बाळासाहेब ठाकरे यांच्या आवाजातील व्हिडिओ आहे.

मुख्यमंत्री एकनाथ शिंदे यांच्या गटाला केंद्रीय निवडणूक आयोगाने शिवसेना आणि धनुष्यबाण हे चिन्ह प्रदान केले आहे. सर्वोच्च न्यायालयात १६ आमदारांच्या अपात्रतेची सुनावणी सुरू असतानाच निवडणूक आयोगाचा हा निर्णय आल्याने उद्धव ठाकरे यांच्या गटाला मोठा धक्का बसला आहे.

सत्याचा विजय : मुख्यमंत्री

निवडणूक आयोगाने लोकशाहीला धरून निर्णय दिला आहे. त्यांचे धन्यवाद. लोकशाहीमध्ये सत्याचा विजय झाला. हा संघर्षाचा विजय आहे, अशी प्रतिक्रिया मुख्यमंत्री एकनाथ शिंदे यांनी या निर्णयानंतर दिली आहे.

आम्ही या निर्णयाला आव्हान देऊ : राऊत

सत्यमेव जयते हे ब्रीद वाक्य तोडून असत्यमेव जयते करावं लागेल. खरेदी विक्री कुठपर्यंत गेलेली आहे, हे स्पष्ट झालं. जो पक्ष बाळासाहेबांनी उभा केला, शिवसैनिकांनी रक्त आणि बलिदान देवून उभा केला. तो पक्ष चाळीस बाजारबुणगे विकत घेतात, याची नोंद इतिहासात राहील. निवडणूक आयोगाने लोकांचा विश्वास गमावला. सगळ्या स्वायत्त यंत्रणा यांना गुलाम करण्यात येत आहे. हा खोक्यांचा विजय आहे. प्रचंड पैशांची उधळण झाली, आम्ही याला आव्हान देऊ, अशी प्रतिक्रिया खासदार संजय राऊत यांनी दिली.