Sharad Pawar Called Meeting MVA : शरद पवारांनी पुन्हा टायमिंग साधलं; महाविकास आघाडीची बोलावली बैठक

मुंबई : एकीकडे पंतप्रधान नरेंद्र मोदी यांच्यासोबत व्यासपीठावर जाऊन चर्चेच्या केंद्रस्थानी आलेले ज्येष्ठ नेते शरद पवार यांनी येत्या पाच ऑगस्ट रोजी महाविकास आघाडीची बैठक बोलावली आहे. त्यामुळे पाच तारखेच्या बैठकीला कोणकोणते नेते उपस्थित राहतात, याकडे संपूर्ण राज्याचे लक्ष असणार आहे. (Sharad Pawar called a meeting of Mahavikas Aghadi on August 5)

पंतप्रधान नरेंद्र मोदी यांना शरद पवार (Sharad Pawar) यांच्या उपस्थितीत आज लोकमान्य टिळक राष्ट्रीय पुरस्कार देऊन गौरविण्यात आले. त्या कार्यक्रमाला पवार यांनी जाऊन नये. मोदींसोबत एकाच व्यासपीठावर एकत्र येऊ नये, त्यातून चुकीचा संदेश जाईल, अशी विनंती इंडिया आघाडीतील सर्वच नेते पवारांना करत होते. मात्र, मोठ्या विरोधानंतरही पवारांनी मोदींसोबत कार्यक्रमाला हजेरी लावली. त्याची चर्चा संपूर्ण देशात सुरू आहे.

मोदींसोबतच्या हजेरीची चर्चा राज्यात सुरू असताना इकडे पवारांनी पुन्हा एकदा गुगली टाकली आहे. आपण मोदींसोबत एका पुरस्कारच्या कार्यक्रमासाठी गेलो होतो. मात्र, राजकीयदृष्ट्या त्यांना आपला विरोध राहील, हे दाखवून देण्यासाठी त्यांनी तातडीने महाविकास आघाडीची (Mahavikas Aghadi) बैठक बोलावली असू शकते, अशीही चर्चा आता रंगली आहे. ती बैठक पाच ऑगस्ट रोजी मुंबईत होणार आहे.

दरम्यान, इंडिया या राष्ट्रीय पातळीवरील विरोधी पक्षांच्या नेत्यांच्या आघाडीची पुढची बैठक मुंबईत होणार आहे. त्या पार्श्वभूमीवर ही बैठक असू शकते. राष्ट्रीय पातळीवर होणाऱ्या आघाडीच्या बैठकीची तयारी कशी करायची, काय नियोजन असणार याबाबतची चर्चा या बैठकीत होण्याची शक्यता आहे.

मुंबईत पाच ऑगस्ट रोजी बोलावलेल्या महाविकास आघाडीच्या बैठकीला शरद पवार यांच्यासोबत शिवसेना पक्षप्रमुख उद्धव ठाकरे आणि काँग्रेसचे नेते उपस्थित राहणार आहेत, असे सांगितले जात आहे. मात्र, सामना या शिवसेनेच्या मुखपत्रातून आजच शरद पवार यांच्यावर टीका करण्यात आली आहे. मोदींसोबत पवारांनी एका व्यासपीठावर जाणे शिवसेनेला आवडलेले नाही, तशी नाराजी त्यांनी सामनाच्या अग्रेलखातून दाखवून दिलेली आहे. त्यामुळे पवारांनी जरी पाच ऑगस्टला बैठक बोलावली असली तरी त्या बैठकीला कोण कोणते नेते उपस्थित राहणार, याकडे संपूर्ण राज्याचे लक्ष असणार आहे.