Sharad Pawar Press Conference : राष्ट्रवादी सोडणाऱ्यांबाबत शरद पवार थेटच बोलले !

Sharad Pawar Press Conference : राष्ट्रवादी काँग्रेसचे अध्यक्ष शरद पवार यांनी मंगळवारी (ता.२) राष्ट्रवादी काँग्रेसच्या राष्ट्रीय अध्यक्षपदावरून पायउतार होण्याची घोषणा केली होती. त्यांच्या या निर्णयाला राज्यभरातील राष्ट्रवादीच्या कार्यकर्त्यांनी विरोध केला होता. त्यानंतर अखेर शरद पवार यांनी हा निर्णय मागे घेतला असून, आता शरद पवारच अध्यक्षपदावर कायम राहणार असल्याचे स्पष्ट झाले आहे.

शरद पवार यांच्या या निर्णयानंतर राष्ट्रवादी काँग्रेस पक्षाच्या (NCP) कार्यकर्त्यांमध्ये आनंदाच वातावरण आहे. शरद पवारांनी आपला निर्णय मागे घेतल्यामुळे राष्ट्रवादी काँग्रेसच्या कार्यकर्त्यांनी ढोल-ताशांच्या गजरात मोठा जल्लोष साजरा करत आनंद व्यक्त केला आहे.

दरम्यान, वाय बी चव्हाण सेंटर येथे पत्रकार परिषदेत पत्रकारांच्या प्रश्नांवर शरद पवार यांनी विविध उत्तरे दिली. यावेळी पक्षातील काही नेते दुसऱ्या पक्षासोबत जाणार असल्याच्या चर्चा होत आहे, असा प्रश्न शरद पवारांना विचारण्यात आला. यावर पवारांनी आपली भूमिका स्पष्ट केली.

या प्रश्नावर शरद पवार म्हणाले, “ मुद्दा असा आहे की, कुणाला जायचंच असेल तर मग तो कोणत्याही राजकीय पक्ष असो, कुणीही कुणाचा मोहताज नाही. त्यामुळे कुणाला थांबवण्याचा प्रश्नच उद्भवत नाही. अशा प्रकारची परिस्थिती निर्माण झाली तर संघटनेत आणखी बळ कसं वाढू शकतं, याकडे अधिक लक्ष दिलं गेलं पाहिजे. हेच मला समजतं. पण अशी गोष्ट आमच्या संघटनेत नाही”, पवार म्हणाले.