शिंदे आणि ठाकरे गट आमने-सामने : पुन्हा एकदा संघर्ष

मुंबई : शिवसेना आणि शिंदे गट यांच्यातला संघर्ष न्यायालयात सुरू असताना आता ही लढाई रस्त्यावरही दिसत आहे. नुकत्याच झालेल्या गणेशोत्सवात ठाकरे गट आणि शिंदे गट आमने सामने येऊन राडा झाला होता. आता धारावी मध्ये शिंदे गट आणि उद्धव गटात काल रात्री पुन्हा बाचाबाची झाली.

धारावी मध्ये शिंदे गटाचे आमदार सदा सरवणकर व विभाग प्रमुख गिरीष धानुळकर यांच्या उपस्थितीत विभागातील शिंदे गटाचे पदाधिकारी निवड व आढावा बैठकीसाठी बैठक घेण्यात आली होती. त्याचवेळी ठाकरे गटातील देवीची मिरवणूक जात असताना शिंदे गटांकडून धारावी पुनर्विकास संदर्भात मोठमोठ्या घोषणाबाजी करण्यात आल्या, त्यावेळी प्रत्युत्तर म्हणून ठाकरे गटाकडून देखील घोषणाबाजी करण्यात आली, तेव्हा हा वाद झाला.

यावेळी पोलीस उपस्थित असल्याने हा वाद थोडक्यात वाद सुटला. या प्रकरणी धारावी पोलीस स्टेशनमध्ये राजेंद्र सूर्यवंशी, चेतन सूर्यवंशी, मुत्तू पठाण या तीन शिवसैनिकांवर गुन्हा दाखल करण्यात आला आहे. आज ठाकरे गटातील शिवसैनिकांना धारावी पोलीस ठाण्यात बोलावून त्यांना समन्स देण्यात आले. त्याचप्रमाणे शिंदे गटालाही नोटिसा बजावून हा वाद मिटवून टाकला असल्याचं विठ्ठल पवार यांनी सांगितलं आहे.