Shiv Sena : आमदार अपात्रता सुनावणी आजपासून फास्ट ट्रॅकवर; वेळापत्रकात मोठा बदल

Disqualification Case : शिवसेना आमदार अपात्रता प्रकरणी सुनावणीच्या वेळापत्रकात विधानसभेचे अध्यक्ष राहुल नार्वेकर यांनी मोठा बदल केला आहे. ही सुनावणी आजपासून फास्टट्रॅकवर घेतली जाणार आहे. शनिवार-रविवारीही सलग सुनावणी होणार असल्याने लवकर निकाल लागण्याची शक्यता वाढली आहे.

सर्वोच्च न्यायालयाने (Supreme Court) ३१ डिसेंबरपर्यंत या प्रकरणाचा निकाल लावण्याचे आदेश दिले आहेत. न्यायालयाने विधानसभा अध्यक्षांना त्यानुसार वेळापत्रक सादर करण्याच्या सुचना दिल्या होत्या. अध्यक्षांकडे सध्या सुनावणी सुरू असून अधिवेशनामुळे त्याला विलंब होण्याची शक्यता व्यक्त केली जात होती. पण नार्वेकर यांनी अधिवेशन काळातही सुनावणीला विलंब होणार नाही, यादृष्टीने वेळापत्रक तयार केले आहे.

सुनावणीच्या वेळापत्रकात मोठा बदल करण्यात आला आहे. त्याची सुरुवात आजपासूनच झाली. उलट साक्ष घेण्यासाठी ठाकरे गटास आणखी एका दिवसाची मुदतवाढ देण्यात आली आहे. त्यानुसार रविवारीही सुनावणी होणार आहे. ११ ते २० डिसेंबर या कालावधीत सलग सुनावणी चालणार आहे. त्यामुळे सुनावणीचा निकाल लवकर लागण्याची शक्यता आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सुधारित वेळापत्रकानुसार ८ व ९ डिसेंबरव आणि ११ व १२ डिसेंबर असे चार दिवस ठाकरे गटाकडून शिंदे गटाच्या साक्षीदारांची उलट साक्ष घेतली जाणार आहे. दोन्ही गटांना १३ ते १५ डिसेंबर या काळात लेखी म्हणणे सादर करण्यास सांगण्यात आले आहे. त्याआधारे १६ ते २० डिसेंबर असे सलग पाच दिवस अंतिम सुनावणी होईल. त्यामुळे विधानसभा अध्यक्षांकडून ३१ डिसेंबरपुर्वीच या प्रकरणाचा निकाल लावण्याची तयारी सुरू असल्याची चर्चा आहे.

आज सकाळीच सुनावणी सुरू

शुक्रवारी सकाळी साडे आठ वाजता सुनावणीला सुरूवात होणार होती. पण शिंदे गटाचे आमदार दिलीप लांडे यांची सुनावणी होणार होती. पण ते २० मिनिटे उशिरा आले. त्यानंतर सुनावणी सुरू झाल्यानंतर ठाकरे गटाचे वकील देवदत्त कामतांनी साक्ष उलटतपासणीला सुरूवात केली. दुपारच्या सत्रात आमदार योगेश कदम यांची उलटतपासणी होणार आहे.

(Edited By - Rajanand More)