Shraddha Walkar's Father Said:..तर आज श्रद्धा जिवंत असती..; श्रद्धाच्या वडीलांचा पोलिसांवर गंभीर आरोप

Shraddha Walkar Murder Case: श्रध्दा वालकर हत्याकांडाने देशभरात एकच खळबळ उडाली आहे. याचा सर्वच स्तरातून निषेध करण्यात येत आहे. यावर पहिल्यादांच तिचे वडील विकास वालकर यांनी पत्रकार परिषदेत शुक्रवारी भाष्य केलं. उपमुख्यमंत्री देवेंद्र फडणवीस यांना भेटल्यानंतर ते पत्रकारांशी बोलत होते.

विकास वालकर म्हणाले, "श्रद्धा वालकर हीच्या हत्येचा तपास वसई आणि दिल्ली पोलिस करीत आहे. हा तपास योग्य दिशेने सुरु आहे. पण सुरवातीला याबाबत खूप त्रास झाला. वसई पोलिसांनी सहकार्य केलं नाही, अन्यथा माझी मुलगी जिवंत असती. माझ्या मुलीला न्याय मिळाला पाहिजे, याबाबत मला देवेंद्र फडणवीस, पोलिसांनी आश्वासन दिले आहे,"

"माझा न्यायव्यवस्थेवर विश्वास आहे. आफताब पूनावाला याला कठोर शिक्षा व्हावी, तसेच त्याच्या कुटुबियांची देखील चौकशी झाली पाहिजे. या कटात सहभागी झालेल्यांचीही चौकशी झाली पाहिजे. धर्म जागृतीवर भर दिला पाहिजे, माझ्या मुलीचे जे झाले ते दु:खदायक आहे," असे वालकर म्हणाले.

आफताब पूनावाला याला आज (शुक्रवारी) दिल्लीतील साकेत न्यायालयात व्हिडिओ कॉन्फरन्सिंगद्वारे हजर करण्यात येणार आहे. 10 दिवसांपूर्वी आफताबला घेऊन जाणाऱ्या व्हॅनवर 4-5 जणांनी हल्ला करण्याचा प्रयत्न केला होता, त्यामुळे तिहार जेलने दिल्ली पोलिसांच्या तिसर्‍या बटालियनला आफताबला विशेष सुरक्षा देण्यास सांगितले आहे. सुनावणी दरम्यान, पोलीस आरोपीविरुद्ध पुरावे न्यायालयात सादर करण्याची शक्यता आहे.

गेल्या महिन्यात आफताबला दिल्लीच्या आंबेडकर हॉस्पिटलमधून व्हिडिओ कॉन्फरन्सिंगद्वारे न्यायालयात हजर करण्यात आले होते. न्यायालयाने त्याला 13 दिवसांची न्यायालयीन कोठडी सुनावली होती. आफताब हा बहुतांश वेळा बुद्धिबळ खेळतो, अशी माहिती तुरुंग अधिकाऱ्यांनी अलीकडेच दिली होती.

तो अनेकदा एकटाच खेळतो आणि पांढरे-काळे तुकडे एकटाच हलवतो. पोलिसांनी दिलेल्या माहितीनुसार, त्याच्यासोबत कैद असलेल्या दोन कैद्यांचे त्याच्याशी भांडण झाले.