न्यायालयाकडून मलिकांना मोठा दिलासा; खासगी रुग्णालयात उपचार करण्याची परवानगी

मुंबई : मनी लाँर्डिंग प्रकरणात ईडीने अटक केलेले मंत्री नबाव मलिक (Nawab Malik) यांना शुक्रवारी मुंबई सत्र न्यायालयाने मोठा दिलासा दिला आहे. वैद्यकीय कारणासाठी त्यांनी मागितलेला तात्पुरता जामीन न्यायालयाने फेटाळला आहे. पण खासगी रुग्णालयात उपचार करण्याची परवानगी न्यायालयाने दिली आहे. (Nawab Malik Latest Marathi News)

मुंबई सत्र न्यायालयातील विशेष पीएमएलए न्यायालयात मलिकांच्या अर्जावर शुक्रवारी सुनावणी झाली. मागील आठवड्यात न्यायालयाने मलिकांच्या न्यायालयीन कोठडीत २० मेपर्यंत वाढ केली आहे. (Special PMLA court allows Nawab Malik to get treated at a private hospital)

मलिकांनी सहा आठवड्यांसाठी तात्पुरता जामीन देण्याची विनंती केली होती. मुत्रपिंडाच्या त्रासामुळे पायांना सूज येत आहे. त्याशिवाय अन्यही आजार आहेत. मूत्रपिंडाच्या आजारावर जे. जे. रुग्णालयाऐवजी खासगी रुग्णालयात शस्त्रिक्रियेद्वारे कायमस्वरूपी उपचार करण्याची गरज असल्याने तात्पुरता जामीन द्यावा, अशी विनंती अर्जात करण्यात आली होती.

मात्र, न्यायालयाने जामीन न देता त्यांना खासगी रुग्णालयात उपचाराची परवानगी देत दिलासा दिला आहे. त्यांच्याजवळ कुटुंबातील एका व्यक्तीला थांबण्याची परवानगी देण्यात आली आहे. सुरक्षाव्यवस्था व उपचाराचा संपूर्ण खर्च मलिकांना करावा लागेल, असं न्यायालयाने म्हटलं आहे.

कुर्ला येथील जमीन व्यवहारात दाऊद इब्राहिमची बहीण हसीना पारकरसोबत झालेल्या आर्थिक व्यवहार प्रकरणात मलिकांना 23 फेब्रुवारी रोजी ईडीने अटक केली आहे. तेव्हापासून नवाब मलिक आर्थर रोड जेलमध्ये न्यायालयीन कोठडीत आहेत. त्यांच्यावर जे. जे. रुग्णालयात उपचार सुरू आहेत.