Kunal Kamra: एकनाथ शिंदेंची टिंगल उडवणाऱ्या कुणाल कामराला पोलिसांनी बजावलं समन्स

Mumbai, 25 March 2025:उपमुख्यमंत्री एकनाथ शिंदे यांची गाण्याच्या माध्यमातून टिंगल उडवणाऱ्या स्टँडअप कॉमेडियन कुणाल कामरा याच्या विरोधात खार पोलिसांनी समन्स बजावलं आहे.

कुणाल कामरा यांच्या कुटुंबियांकडे खार पोलिसांनी समन्स दिले आहे. कुणाल याला व्हॅाटस्अँपवरुन पोलिसांनी हे समन्स पाठवले आहे. आज सकाळी अकरा वाजता चौकशीसाठी हजर राहावे, असे पोलिसांनी समन्समध्ये म्हटलं आहे.

कुणाल कामरा हा आपल्या विधानावर ठाम आहे. आपण माफी मागणार नाही, कोर्टानं सांगितलं तरच माफी मागणार, अशी ठाम भूमिका कुणालने घेतली आहे. याबाबत त्याने सोशल मीडियावर पोस्ट शेअर केली आहे.

उपमुख्यमंत्री एकनाथ शिंदे यांच्यावर टीका करणारं गाणं कुणाल कामराने गायलं आहे. त्यानंतर शिवसैनिकांमध्ये संतापाची लाट उसळली आहे. संतप्त कार्यकर्त्यांनी कुणाल कामरा यांच्या स्टुडिओची तोडफोड केली आहे.

पोलिसांनं सहकार्य करणार असल्याचे त्याने एक्सवर म्हटलं आहे. मी बेडखाली लपून बसणाऱ्यांपैकीही नाही, असं सांगतानाच अजित पवार जे बोलले तेच मी बोललोय, असे कुणाल कामराने म्हटलं आहे.

कुणार कामराने काय म्हटलं आहे एक्सवर

• हॅबिटॅट हा एक मनोरंजनाचा मंच आहे. सर्व प्रकारच्या जागांसाठीचं ते एक व्यासपीठ आहे.

• हॅबिटॅट (किंवा इतर कोणतेही स्थळ) माझ्या विनोदासाठी जबाबदार नाही.

• माझं बोलणं आणि कृती यावरही कोणतं नियंत्रण नाही. कोणताही राजकीय पक्षही नाही.

• एका विनोदी कलाकाराच्या शब्दावरून एखाद्या ठिकाणावर हल्ला करणे तितकेच मूर्खपणाचे आहे.

• तुम्हाला दिलेले बटर चिकन आवडले नाही म्हणून टोमॅटो घेऊन जाणारा ट्रक उलटवण्याचाच हा एक प्रकार आहे, असा चिमटा कुणालने काढला आहे.

मी धमक्यांना घाबरत नाही

कॉमेडियन कुणाल कामराने माफी मागण्यास नकार दिला आहे. राजकारण्यांची खिल्ली उडवणं कायद्याविरोधात नसल्याचे त्याने सोशल मीडियावर म्हटलं आहे. तपास यंत्रणा, कोर्टाला सहकार्य करणार असल्याचे त्याने सांगितले आहे. मी धमक्यांना घाबरत नाही असे त्याने स्पष्ट केले आहे.