Bala Nandgaonkar :...तेव्हा मलाच शिवसेनेत येण्याचं आवाहन केलं होतं; बाळा नांदगावकरांचा गौप्यस्फोट

MNS : महाराष्ट्र नवनिर्माण सेनेचा मेळावा मुबंई येथील छत्रपती शिवाजी महाराज पार्क मैदानावर मेळावा पार पडला. या मेळाव्यात मनसे नेते बाळा नांदगावकर यांनी उद्धव ठाकरे यांच्यावर जोरदार टीका केली. तसेच राज ठाकरे आणि उद्धव ठाकरे यांना एकत्र करण्यासाठी त्यांनी मध्यस्थी केल्याचा एक प्रसंग सांगितला.

नांदगावकर म्हणाले, ''2017 साली मी 'मातोश्री'वर दोन भाऊ एकत्र यावे, यासाठी गेलो होतो. मात्र, यावेळी त्यांनी मलाच शिवसेनेत या, असं सांगितलं. मी दोन्ही भाऊ एकत्र येण्यासाठी प्रयत्न करत होतो. पण मलाच शिवसेनेत येण्याच आवाहन त्यांनी केलं होतं. याचे साक्षिदार मिलिंद नार्वेकर, शेवाळे यांच्यासह अनेक जण होते'', असा खुलासा त्यांनी केला.

उद्धव ठाकरे यांना लहान भावाबाबत कधीही आपुलकी वाटली नाही. त्यामुळे तेव्हा मी युतीचा प्रस्ताव घेऊन गेलो होतो, तो त्यांनी नाकारला, असा गौप्यस्फोट नांदगावकर यांनी केला. तसेच संजय राऊत यांना राज ठाकरेंनी मोठं केलं. पण ते कधी त्यांचे झाले नाहीत, तर ते तुमचे (उद्धव ठाकरे यांचे) काय होणार?'', असा सवाल उद्धव ठाकरेंना त्यांनी केला.

''शिवसेनेतून (ठाकरे गट) नारायण राणे का बाहेर पडले?, राज ठाकरे का बाहेर पडले? असा सवाल करत जर राज ठाकरेंच्या हातात शिवसेना पक्षाची धुरा असती तर नारायण राणे बाहेर पडले नसते. एकनाथ शिंदे बाहेर पडले नसते. 40 आमदार बाहेर पडले नसते. शिवसेनेचे खासदारही बाहेर पडले नसते. मात्र, तुम्ही आपल्याच लोकांना संपवण्याचे काम केलं'', असा घणाघात नांदगावकरांनी उद्धव ठाकरे यांच्यावर केला.