Mantralay Self Harm News: मंत्रालयासमोर एकाच दिवसात तिघांचा आत्महत्येचा प्रयत्न; एकाचा मृत्यू

Mantralay Latest news Update: मंत्रालयासमोर सोमवारी (२७ मार्च) दिवसभरात तीन आत्महत्येच्या घटनांनी एकच खळबळ उडाली आहे. यातील एका घटनेमध्ये 63 वर्षीय महिलेचा मृत्यू झाल्याची माहिती समोर आली आहे.

मिळालेल्या माहितीनुसार, पीडित महिलेची धुळ्यात नऊ गुंठे जागा एका व्यक्तीने बळकावली आहे. या विरोधात ती सरकार दरबारी न्याय मागण्यास आली होती. पण प्रशासनाकडून कोणतीही मदत न मिळाल्याने संबंधित महिलेने मंत्रालयाच्या आारातच कीटकनाशक औषध पिऊन आत्महत्येचा प्रयत्न केला.

या घटनेनंतर पीडित महिलेला उपचारासाठी तात्काळ जे जे रुग्णालयात हलवण्यात आले. मात्र उपचारादरम्यान या महिलेचा मृत्यू झाला. शितल गादेकर असे या महिलेचे नाव आहे. याप्रकरणी मरीन ड्राईव्ह पोलीस अधिक तपास करत आहेत. पीडित महिला ही मंत्रालयात जवळ येण्यापूर्वीच कीटकनाशक औषध घेऊन आली असल्याचे तपासात समोर आले आहे

तर दुसऱ्या घटनेत संगीता डवरे या महिलेचे पती नवी मुंबई पोलिस दलात कार्यरत असून त्यांचा काही दिवसांपूर्वी अपघात झाला होता. या अपघातात जखमी महिलेच्या पतीवर रुग्णालयातील डॉक्टरांनी व्यवस्थित उपचार न केल्याने त्यांच्यावर कारवाई व्हावी, याबाबत तक्रार नोंदवली होती. संबंधित डॉक्टरांवर कारवाई होत नसल्याचा कारणाने तिने काल येऊन मंत्रालय समोर आत्महत्येचा प्रयत्न केला. संगीता यांच्यावर जे जे रुग्णालयात उपचार सुरू असल्याची माहिती पोलिसांकडून देण्यात आली आहे.

तर तिसऱ्या घटनेत पुण्याच्या मावळ तालुक्यातील रमेश मोहिते यांनी आत्महत्येचा प्रयत्न केला. अपंगांना अनुदानात वाढ करून देण्यात यावी. यासाठी रमेश मोहिते अंगावर ज्वलनशील पदार्थ ओतून घेत स्वतःला पेटवून घेण्याचा प्रयत्न केला. वेळीच मंदिरा पोलिसांनी प्रसंगावधान दाखवत त्यांना अडवले आणि ताब्यात घेतले. या प्रकरणी पोलीस अधिक तपास करत आहेत.