Shivsena News : "राणे, शिंदे आणि मी मुख्यमंत्री होऊ नये म्हणून उद्धव ठाकरेंनी..." रामदास कदमांचा खळबळजनक गौप्यस्फोट

Shivsena News, 08 Sep : शिवसेना पक्ष फुटीपासून उद्धव ठाकरे (Uddhav Thackeray) यांच्याविरोधात आक्रमक भूमिका घेत अनेक गौप्यस्फोट करणारे एकनाथ शिंदे गटाचे नेते रामदास कदम यांनी आता आणखी एक खळबळजनक दावा केला आहे.

मी मुख्यमंत्री होईल याची उद्धव ठाकरेंना भीती होती. त्यामुळेच त्यांनी मी मागितलेला मतदारसंघ न देता मला दुसरा मतदारसंघ देऊन पाडल्याचा दावा कदम यांनी केला आहे. उद्धव ठाकरे यांनी माझ्यासह नारायण राणे आणि एकनाथ शिंदे (Eknath Shinde) मुख्यमंत्री होऊ नये म्हणून कारवाया केल्याचा आरोपही कदम यांनी केला आहे.

...म्हणून शिवसेना फुटली

कदम म्हणाले, मला बाळासाहेब ठाकरे मुख्यमंत्री बनवतील अशी भीती उद्धव यांना होती. म्हणून मी दापोली मतदारसंघ मागितला असतानाही त्यांनी मला मुद्दाम गुहागर मतदारसंघातून उभं करून माझा पराभाव करण्यासाठी काही नेत्यांना कामाला लावलं. उद्धव ठाकरेंच्या या राक्षसी महत्त्वकांक्षेमुळेच आज शिवसेना (Shivsena) फुटली असल्याचा दावाही त्यांनी यावेळी केला.

उद्धव ठाकरे आयत्या बिळावर नागोबा

उद्धव ठाकरे (Uddhav Thackeray) आयत्या बिळावर नागोबा झाले आहेत त्यांनीच आम्हाला बाजूला व्हायला भाग पाडल्याचा आरोप देखील कमद यांनी यावेळी केला. ते म्हणाले, "बाळासाहेबांचा पुत्र म्हणून उद्धव ठाकरेंना आयती गादी मिळाली आहे. त्यांनी कधी आपल्या अंगावर केसेस घेतलेल्या नाहीत.

ते आयत्या बिळावर नागोबा झाले आहेत. त्यांनी नेहमी मराठी माणसात फूट पाडण्याचं काम केलं. आम्हालाच बाजूला व्हायला भाग पाडलं. आज ते काँग्रेसचे पाय चाटत आहेत. आम्ही तर शिवसेना प्रमुखांची विचारधारा पुढे घेऊन जात आहोत."

दरम्यान, नुकतेच काही दिवसांपूर्वी कमद यांनी उद्धव ठाकरेंबाबत एक गौप्यस्फोट केला होता. शिवसेनेची साथ सोडून गुवाहाटीला गेलेले आमदार मी दोन तासांत परत 'मातोश्री'वर आणतो. पण तुम्ही काँग्रेसची साथ सोडा, असं मी उद्धव ठाकरेंनी सांगितलं होतं. शरद पवारांची भेट घेतल्यानंतर त्यांनी माझं ऐकलं नाही, असं कमद यांनी सांगितलं होतं.