Ulhasnagar Politics : उल्हासनगमध्ये शरद पवार गटाला धक्का, असंख्य समर्थकांसह सीमा आहुजा यांचा काँग्रेसमध्ये प्रवेश

Ulhasnagar News, 22 Sep : आगामी विधानसभा निवडणुकीच्या पार्श्वभूमीवर अनेक नेते आपल्यासाठी सेफ वाटणाऱ्या पक्षात प्रवेश करत आहेत. अशातच आता ऐन निवडणुकीच्या तोंडावरच राष्ट्रवादी शरदचंद्र पवार पक्षाला उल्हासनगरमध्ये मोठा धक्का बसला आहे.

महिला अध्यक्ष सीमा आहुजा (Seema Ahuja) यांनी त्यांचे पती उद्योगपती महेश आहुजा यांच्यासह असंख्य समर्थकांसोबत काँग्रेसमध्ये जाहीर प्रवेश केला आहे. हा पप्पू कालानी यांच्यासाठी मोठा धक्का मानला जात आहे.

शिवाय महाविकास आघाडीमधीलच (Mahavikas Aghadi) मित्र पक्ष असलेल्या काँग्रेसमध्येच पवार गटातील आहुजा यांनी प्रवेश केल्यामुळे विविध तर्क-वितर्क लढवले जात आहेत. टीम ओमी कालानीचे सर्वेसर्वा ओमी कालानी यांची पत्नी पंचम कालानी या राष्ट्रवादी शरदचंद्र पवार पक्षाच्या असून सीमा आहुजा यांच्यावर महिला अध्यक्षपदाची जबाबदारी सोपवण्यात आली होती.

ओमी कालानी यांनी यंदा शरद पवारांच्या (Sharad Pawar) राष्ट्रवादीकडून उल्हासनगर विधानसभा निवडणूक लढवण्याचा निर्णय घेतला असून ते पक्षश्रेष्ठींकडे तिकीट मागणार आहेत. यासाठी त्यांनी मोर्चेबांधणी देखील सुरू केली आहे. तर पप्पू कालानी हे त्यांच्या प्रचाराची धुरा सांभाळणार आहेत.

असं असतानाच आता राष्ट्रवादी शरदचंद्र पक्षाच्या महिला अध्यक्ष सीमा आहुजा, महेश आहुजा, कमल केशवाणी, मनोज चव्हाण यांनी शनिवारी टिळक भवन येथे असंख्य समर्थकांसमवेत प्रदेशाध्यक्ष नाना पटोले (Nana Patole) यांच्या उपस्थितित काँग्रेसमध्ये प्रवेश केला.

यावेळी महाराष्ट्र प्रदेश महिला काँग्रेसच्या अध्यक्षा संध्या सव्वालाखे, आ.राजेश राठोड, महाराष्ट्र प्रदेश काँग्रेस कमिटीचे अल्पसंख्यांक विभागाचे अध्यक्ष वजाहत मिर्जा, महाराष्ट्र प्रदेश काँग्रेस कमिटीचे उपाध्यक्ष (संघटन व प्रशासन) नाना गावंडे, उल्हासनगर जिल्हा काँग्रेस कमिटीचे अध्यक्ष रोहित साळवे आदी पदाधिकारी आणि कार्यकर्ते उपस्थित होते.