Lokneta Vinayakrao Mete Vikas Aghadi: मोठी बातमी : मराठा आरक्षणासाठी लढणाऱ्या नेत्याच्या नावाने नवीन पक्ष ..

Lokneta Vinayakrao Mete Vikas Aghadi : राज्यात सध्या विधानसभा,लोकसभा निवडणुकांचे वारे वाहण्यास सुरवात झाली आहे. सर्वच राजकीय पक्ष कामाला लागले आहेत.

लोकसभा आणि विधानसभा दोन्ही निवडणुका एकाच वेळी होण्याचे शक्यता काही नेत्यांनी व्यक्त केली आहे. आगामी विधानसभेसाठी राज्य पातळीवरील पक्षांनी निवडणुकीच्या जोरदार तयारी केल्याचे दिसते.

मराठा आरक्षणासाठी नेतृत्व केलेले दिवंगत नेते विनायक मेटे यांच्या नावानेही नवीन पक्षाची नोंदणी केली आहे. मेटे यांच्या बीड जिल्ह्यातील घरच्या पत्त्यावरच या पक्षाची नोंदणी करण्यात आली आहे.

लोकनेते विनायकराव मेटे विकास आघाडी (बीड), असे या पक्षाचे नाव आहे. मेटेंच्या घरच्या पत्त्यावर या पक्षाचा पत्ता आहे. १४ आँगस्ट २०२२ रोजी मेटे यांचा अपघाती मृत्यू झाला.

विनायक मेटे यांना सर्वप्रथम विधान परिषदेवर संधी मिळाली. त्यानंतर त्यांनी महाराष्ट्र नगर विकास पक्ष स्थापन केला.राष्ट्रवादी काँग्रेसच्या स्थापनेनंतर त्यांनी त्यांचा पक्ष राष्ट्रवादीमध्ये विलीन केला होता.

राष्ट्रवादीमध्ये असतानाच त्यांनी शिवसंग्राम संघटनेची स्थापना करून मराठा आरक्षण आणि शिवस्मारक उभारणीसाठी आंदोलने केली. पण 2014 च्या लोकसभा निवडणुकीत मेटेंनी भाजपला मदत केली. 2014 ची विधानसभा निवडणूक त्यांनी बीड विधानसभा मतदारसंघातून लढवली होती.

मात्र, राष्ट्रवादी काँग्रेस पक्षाचे उमेदवार जयदत्त क्षीरसागर यांच्याकडून त्यांना पराभव स्वीकारावा लागला. भाजपने त्यांना शिवस्मारक समितीचे अध्यक्षपद दिले होते. त्यांची पुन्हा विधान परिषदेवर निवड करण्यात आली होती. 2022 पर्यंत ते विधान परिषदेचे आमदार होते.

विनायक मेटे हे मराठा समाजासाठी लढा देणारे लढवय्ये नेते म्हणून ओळखले गेले. मराठा क्रांती मूक मोर्चा आयोजनामध्ये त्यांची महत्त्वाची भूमिका होती.आधी काँग्रेस आणि नंतर भाजपसोबत त्यांनी मराठा समाजाला न्याय मिळवून देण्यासाठी काम केले. (Latest Marathi News)

(Edited By : Mangesh Mahale)