महाविकास आघाडीची भूमिका ठरविण्यासाठी आम्हाला एकत्रित बसावे लागेल

मुंबई - शिवसेना प्रमुख उद्धव ठाकरे यांनी मुख्यमंत्रीपदाचा राजीनामा दिल्याने महाविकास आघाडीचे सरकार कोसळले आहे. शिवसेनेचे बंडखोर आमदार एकनाथ शिंदे यांना भाजपचे नेते देवेंद्र फडणवीस यांनी मुख्यमंत्रीपदाचा उमेदवार म्हणून सादर केले आहे. राज्यातील या राजकीय परिस्थितीत महाविकास आघाडीची काय भूमिका असणार यावर माजी मंत्री बाळासाहेब थोरात ( Balasaheb Thorat ) यांनी मत व्यक्त केले. Balasaheb Thorat News Update

बाळासाहेब थोरात म्हणाले की, उद्धव ठाकरे हे सरळ स्वभावाचे, संवेदनशील व्यक्तिमत्त्व आहे. त्यांना काही गोष्टी नाही रूचत त्यामुळे राजीनामा देऊन ते मोकळे झाले, असे त्यांनी सांगितले.

शिवसेनेच्या कायदेशीर लढाई विषयी त्यांनी सांगितले की, पुढे काय घडते हे मला माहिती नाही. हा शिवसेनेचा प्रश्न आहे. ते निर्णय घेतील, असे त्यांना स्पष्ट केले.

महाविकास आघाडीच्या भूमिकेबाबत ते म्हणाले, महाविकास आघाडीची भूमिका ठरविण्यासाठी आम्हाला एकत्रित बसावे लागेल. चर्चा करावी लागेल. विरोधी पक्षनेता कोण हे ठरवावे लागणार आहे, असे त्यांनी सांगितले.

शिवसेनेतील बंडखोर आमदारांनी मात्र शिवसेना फुटण्याला काँग्रेस व राष्ट्रवादी काँग्रेसला दोषी ठरविले आहे. त्यामुळे महाविकास आघाडीची भूमिका स्पष्ट होणे विरोधी गटासाठी महत्त्वाचे ठरणार आहे.