Ramdas Athawale : शरद पवारांनी 'ही' बाब अजितदादांना सांगायला हवी होती; रामदास आठवलेंचं मोठं विधान

Ramdas Athawale News : ''मी देत आहेत राष्ट्रवादी कॉंग्रेसला शाप, कारण निवडून येणार आहेत अश्विनी जगताप, नरेंद्र मोदी आहेत विरोधकांचे बाप, कारण निवडून येणार आहेत अश्विनी जगताप...'' अशा काव्यपंक्तींनी केंद्रीय मंत्री रामदास आठवले यांनी विरोधकांना टोला लगावला. तसेच यावेळी आठवलेंनी शरद पवार,अजित पवारांवर निशाणाही साधला.

चिंचवड विधानसभा पोटनिवडणुकीतील उमेदवार अश्विनी जगताप यांच्या प्रचारार्थ महायुतीच्या दिग्गज नेत्यांची गुरुवारी( दि.23) रात्री सांगवीत सभा झाली. केंद्रीय सामाजिक न्याय राज्यमंत्री तथा `आरपीआय`चे राष्ट्रीय अध्यक्ष रामदास आठवले यांनी काव्यपंक्तीद्वारे विरोधकांवर टीका केली.

रामदास आठवले(Ramdas Athawale) म्हणाले, ही निवडणूक बिनविरोध व्हावी अशी भूमिका होती. पण,अजित पवार म्हणाले,होऊन जाऊ द्या.तर आता होऊनच जाऊ द्या. यावेळी येथे उमेदवार देऊ नये असे पवारसाहेबांनी अजितदादांना सांगायला हवं होतं असं ते म्हणाले. काहीही करा, कितीही शिव्या द्या,तरीही २०२४ ला पुन्हा भाजप सत्तेत येऊन मोदी हेच पुन्हा पंतप्रधान होणार, ते झाले की मी ही मंत्री होणार असा विश्वासही आठवलेंनी व्यक्त केला. मी कॉंग्रेसबरोबर होतो,पण ते माझे ऐकत नव्हते असा टोलाही लगावला.

बाबासाहेब आंबडेकर यांनी देशाला दिलेले संविधान बदलण्याचा प्रयत्न सध्याचे केंद्र सरकार व पंतप्रथान नरेंद्र मोदी हे करीत असल्याचा आरोप विरोधकांकडून वारंवार करण्यात येत आहे. तो आठवलेंनी यावेळी खोडून काढला.कोण म्हणतो बाबासाहेबांचे संविधान हे सरकार बदलणार आहे,ते कोणी बदलू शकत नाहीत,असे ते म्हणाले.उलट मोदी ते आणखी मजबूत करीत आहेत अशी पाठराखण आठवलेंनी केली.