Mumbai Police Transfers: 'BMC' निवडणुकीच्या तोंडावर मुंबई पोलिस दलात मोठी उलथापालथ; एकाचवेळी 13 उपायुक्तांच्या बदल्यांचे आदेश

Mumbai News : मुख्यमंत्री देवेंद फडणवीसांकडे असलेल्या गृह विभागाकडून राज्य पोलिस दलात मोठे बदल केले जात आहे. काही दिवसांपूर्वीच महाराष्ट्र पोलिस दलात मोठ्या प्रमाणावर अधिकाऱ्यांच्या बदल्या करण्यात आल्या होत्या. त्यानंतर मागच्याच आठवड्यात राज्य सरकार आणि गृहखात्याकडून तब्बल 22 पोलिस अधीक्षक आणि उपायुक्तांच्या बदल्यांचे आदेश जारी केले होते. अशातच आता मुंबई पोलिस (Mumbai Police) दलातही खांदेपालट करण्यात आले आहे.

कुठल्याही क्षणी मुंबई महापालिकेच्या निवडणुक कार्यक्रमाची घोषणा होण्याची शक्यता आहे. याच पार्श्वभूमीवर महायुतीसह विरोधी बाकावर असलेल्या आघाडीकडूनही मुंबई महापालिकेसाठी जोरदार मोर्चेबांधणी सुरू केली आहे. त्यातच भाजपनं यावेळी काही करुन महापालिका ताब्यात घ्यायचीच असा चंग बांधला आहे. त्याच धर्तीवर आता पडद्यामागच्या घडामोडींना वेग पकडला आहे.

मागच्याच माहिन्यात वरिष्ठ आयपीएस अधिकारी देवेन भारती यांची मुंबई पोलिस आयुक्तपदी नियुक्ती करण्यात आली आहे. अशातच आता मुंबई पोलिस दलातही आता मोठे फेरबदल करण्यात आले आहेत. यात 13 उपायुक्तांच्या बदल्यांचे आदेश शुक्रवारी (ता.30) काढण्यात आले आहेत.

पोलिस दलातील या बदलांमुळे मुंबईसह राज्यातील इतर काही जिल्ह्यांतील अचानक झालेल्या नियुक्त्या आणि बदल्यांमुळे प्रशासकीय वर्तुळात चर्चांना उधाण आले आहे. काही दिवसांपूर्वीच कोल्हापूरचे पोलिस अधीक्षक महेंद्र पंडित यांची ठाणे शहर पोलिस दलात उपायुक्तपदी बदली झाली आहे तर सातारा जिल्ह्याचे पोलिस अधीक्षक समीर शेख यांना बृहन्मुंबई पोलिस दलात उपायुक्तपदी नियुक्त करण्यात होती.

आगामी महापालिका निवडणुकीच्या तोंडावर मुंबई (Mumbai) पोलिस दलातील बदल्यांचा धडाका सुरुच असल्याचं दिसून येत आहे. राज्य सरकारकडून सुरु असलेल्या पोलिस दलातील या बदल्यांना अतिशय महत्त्वाच्या मानल्या जात आहे. याच बदल्यांमागं राजकीय दबावतंत्राचा रणनीती असल्याचाही आरोप विरोधकांकडून केला जात आहे.

गेल्या महिन्यात विवेक फणसळकर हे 35 वर्षे पोलिस दलात सेवा केल्यानंतर निवृत्त झाले. त्यांच्याजागी 1994 च्या बॅचचे आयपीएस अधिकारी व तत्कालीन मुंबईचे विशेष पोलिस आयुक्त देवेन भारती यांची बुधवारी (ता.३० एप्रिल) मुंबईचे नवीन पोलिस आयुक्त म्हणून नियुक्ती करण्यात आली होोती.

राज्यात शिंदे सरकार सत्तेत आल्यानंतर देवेंद्र फडणवीस गृहमंत्री होते. त्यावेळी मुंबई पोलीस दलात 'विशेष पोलीस आयुक्त' पदाची निर्मिती करण्यात आली होती. या पदावर मुंबईचे विद्यमान पोलीस आयुक्त देवेन भारती यांची नियुक्ती केली होती. मुंबई पोलिसांच्या इतिहासात प्रथमच विशेष आयुक्त (स्पेशल सीपी) हे पद निर्माण करण्यात आले होते.

देवेन भारती हे फडणवीसांच्या मर्जीतील अधिकारी असल्याने त्यांच्यासाठी या पदाची निर्मिती करण्यात आल्याची टीका झाली होती. पण आता भारती यांची मुंबई पोलीस आयुक्त म्हणून नियुक्ती झाली आहे. त्यानंतर 'विशेष पोलीस आयुक्त' पदाचे काय होणार असा सवाल विचारला जात होता.