Mumbai–Ahmedabad Bullet Train : ऐन निवडणुकीपूर्वी महापालिकेचा दणका! मुंबई-अहमदाबाद बुलेट ट्रेन स्टेशनचं काम बंद पाडलं

Mumbai News, 25 Dec : मुंबई-अहमदाबाद बुलेट ट्रेन प्रकल्पातील वांद्रे-कुर्ला संकुल (BKC) येथील स्टेशनच्या बांधकामात वायू प्रदूषण नियंत्रण नियमांचे उल्लंघन केल्यामुळे मुंबई महापालिकेने संबंधित काम तात्काळ बंद करण्याची नोटीस बजावत थांबवलं आहे.

एकीकडे मुंबई महापालिकेची सत्ता आपल्या ताब्यात यावी यासाठी राजकीय पक्षांनी कंबर कसली आहे. मात्र, दुसरीकडे याच मुंबईतील वायू प्रदूषणाची समस्या दिवसेंदिवस वाढत असून यावर मुंबई महापालिका काहीच उपाययोजना करत नसल्याचं समोर आलं आहे.

कारण मुंबईतील वायू प्रदूषणाच्या समस्या गांभीर्याने न घेता त्याकडे काणाडोळा केल्याबद्दल उच्च न्यायालयाने बुधवारी सलग तिसऱ्या दिवशी मुंबई महापालिकेला सुनावलं. प्रदूषणाची समस्या अनेक वर्षांपासून मुंबईला भेडसावत असताना प्रदूषण कमी करण्यासाठी प्रभावी उपाययोजना करण्याऐवजी मुंबईसारख्या शहरात एक हजार कोटींपेक्षा जास्त रकमेच्या 125 हून अधिक बांधकाम प्रकल्पांना मंजुरी दिलीच कशी? असा सावल न्यायालयाने महापालिका आयुक्त भूषण गगराणी यांना केला होता.

त्यामुळे प्रदुषणाच्या बाबतीत मुंबई महापालिकेचा भोंगळ कारभार समोर आल्यामुळे पालिकेच्या कारभारावर प्रश्नचिन्ह उपस्थित केले जात होते. अशातच आता पालिकेने मुंबई-अहमदाबाद बुलेट ट्रेन प्रकल्पातील वांद्रे-कुर्ला संकुल (बीकेसी) येथील स्टेशनच्या बांधकामात वायू प्रदूषण नियंत्रण नियमांचे उल्लंघन केल्या प्रकरणी मुंबई महापालिकेने बुलेट ट्रेन स्थानकाचे काम तात्काळ बंद करण्याची नोटीस बजावली आहे.

बीकेसी परिसरातील बांधकामामुळे धूळ आणि प्रदूषणाचे प्रमाण वाढल्याच्या तक्रारी पालिकेकडे प्राप्त झाल्या होत्या. त्यानंतर पालिकेच्या तपासणीत नियमांचे उल्लंघन झाल्याचं आढळल्यामुळे. आवश्यक धूळ नियंत्रण उपाय, पाण्याचा फवारा, आच्छादन आणि पर्यावरणीय नियमांची अंमलबजावणी न झाल्याने ही कारवाई केल्याचं पालिकेकडू करण्यात आली आहे.

शिवाय महापालिकेने संबंधित यंत्रणेला आवश्यक त्या सुधारणा करण्याचे निर्देश दिले आहेत. तर या सुधारणा पूर्ण झाल्याशिवाय काम सुरू करता येणार नाही, असंही महापालिकेने सांगितलं आहे.