OBC Sub Committee: ओबीसी उपसमितीत 'या' मंत्र्यांचा समावेश; छगन भुजबळ, बावनकुळेंवर मोठी जबाबदारी

OBC Sub Committee: ओबीसी समाजाच्या विविध प्रश्नांसंबंधी काम करण्यासाठी राज्य मंत्रिमंडळानं उपसमिती नेमण्याला मान्यता देण्यात आली आहे. यामध्ये कुठल्या सदस्य मंत्र्यांचा समावेश असेल हे देखील जाहीर करण्यात आलं आहे. त्यानुसार, छगन भुजबळ आणि चंद्रशेखर बावनकुळे यांच्यावर शासनानं मोठी जबाबदारी सोपवली आहे. राज्य मंत्रिमंडळाच्या बैठकीत हा निर्णय घेण्यात आला.

कशी असेल ओबीसी उपसमिती?

राज्य सरकारच्या यापूर्वीच्या कॅबिनेट बैठकीत ओबीसींसाठी स्वतंत्र उपसमिती स्थापन करण्यात यावी अशी मागणी करण्यात येत होती. या मागणीनुसार आज मुंबईत मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रीमंडळाच्या बैठकीत उपसमिती स्थापन करण्याला मान्यता देण्यात आली. तसंच या समितीत किती आणि कोण सदस्य असतील त्यांची नावंही जाहीर करण्यात आली आहेत.

यामध्ये चंद्रशेखर बावनकुळे हे या उपसमितीचे अध्यक्ष असणार आहेत. त्याचबरोबर छगन भुजबळ, गणेश नाईक, गुलाबराव पाटील, संजय राठोड, पंकजा मुंडे, अतुल सावे, दत्तात्रय भरणे आदींचा या समितीत सदस्य म्हणून समावेस असेल. यामध्य़े भाजपचे ४, शिवसेनेचे २ आणि राष्ट्रवादीचे २ इतके मंत्री या समितीत असतील.

उपसमितीचा उद्देश काय?

दरम्यान, ओबीसींच्या शैक्षणिक, सामाजिक आणि आर्थिक योजनांसाठी ही ओबीसी उपसमिती काम करणार आहे. मराठा आरक्षणविषयक उपसमितीच्या धर्तीवर ओबीसींसाठी ही उपसमिती स्थापन करण्यात आली आहे.