Marathi Language Mandatory : मराठी भाषेवरून चालकांवर टांगती तलवार! तीन महिन्यांत सुधारणा करा, नाहीतर RTO कडून परवाना होणार निलंबित!

Pune News : इलेक्ट्रॉनिक मीटर बसविलेल्या वाहनांच्या परमिटधारकांसह संबंधित वाहनचालकांना आता मराठी भाषेचे कार्यज्ञान असणे बंधनकारक करण्यात आले आहे. महाराष्ट्र शासनाच्या परिवहन विभागाने महाराष्ट्र मोटार वाहन नियम, 1989 मध्ये महत्त्वपूर्ण सुधारणा केली असून, मराठीचे ज्ञान नसलेल्या चालकांवर कारवाईचा बडगा उगारण्यात येणार आहे.

नव्या नियमानुसार, संबंधित चालकाला मराठी भाषेचे आवश्यक ज्ञान नसल्याचे आढळल्यास परवाना प्राधिकरणाकडून त्याला मराठी भाषा शिकण्यासाठी एक महिन्याची मुदत दिली जाणार आहे. या मुदतीत चालकाने आवश्यक भाषाज्ञान संपादन न केल्यास त्याला कारणे दाखवा नोटीस बजावण्याची कारवाई सुरू करण्यात येणार आहे.

त्यानंतरही नियमांचे पालन न झाल्यास चालकाच्या वाहनचालक परवान्यावरील बॅज/अधिकृतता तब्बल तीन महिन्यांपर्यंत निलंबित केली जाऊ शकते. निलंबनानंतरही चालकाने नियमांचे पालन केले नाही, तर त्याची बॅज/अधिकृतता रद्द करण्याची कारवाई करण्यात येणार आहे.

परमिट नूतनीकरणासाठीही मराठीचे ज्ञान आवश्यक

केवळ चालकांपुरता हा नियम मर्यादित नसून, वाहनाच्या परमिट नूतनीकरणाच्या वेळी परमिटधारकाला मराठी भाषेचे आवश्यक ज्ञान असल्याचे प्राधिकरणाच्या समाधानाप्रमाणे सिद्ध करावे लागणार आहे. त्यामुळे परमिट नूतनीकरण करताना मराठी भाषेचे ज्ञान हा महत्त्वाचा निकष ठरणार आहे.

RTO मध्ये होणार भाषेची परीक्षा

संबंधित परमिटधारकांच्या मराठी भाषेच्या ज्ञानाची चाचणी प्रादेशिक परिवहन कार्यालयातील मोटार वाहन निरीक्षकांमार्फत घेण्यात येणार आहे. ही चाचणी उत्तीर्ण होणे संबंधित परमिटधारकांसाठी अनिवार्य करण्यात आले आहे. महाराष्ट्र शासनाच्या राजपत्रातील असाधारण भाग चार-अमध्ये 12 ऑगस्ट 2026 रोजी या सुधारणांची अधिसूचना प्रसिद्ध करण्यात आली आहे. त्यामुळे पुण्यासह राज्यातील संबंधित परमिटधारक आणि वाहनचालकांनी नव्या नियमांची नोंद घेण्याचे आवाहन प्रादेशिक परिवहन कार्यालय, पुणे यांच्याकडून करण्यात आले आहे.