Pune Bypoll Election : चिंचवडमध्ये 50 टक्के मतदान; काय सांगते आकडेवारी?

By Election : आमदार लक्ष्मण जगताप यांच्या निधनामुळे चिंचवड विधानसभेसाठी पोटनिवडणूक जाहीर करण्यात आली. या निवडणुकीत भाजपकडून अश्विनी जगताप, महाविकास आघाडीतील राष्ट्रवादीचे नाना काटे तर ठाकरे गटाचे बंडखोर अपक्ष राहुल कालटे अशी तिरंगी लढत झाली.

दरम्यान भाजप आणि महाविकास आघाडीकडून राज्यातील बड्या नेत्यांनी प्रचार केल्याने चिंचवडचे वातावरण चांगलेच ढवळले होते. त्यामुळे मतदानाचा टक्का वाढण्याची शक्यता होती. मात्र तसे झाल्याचे दिसून आले नाही.

चिंचवड (Chinchwad) विधानसभा मतदार संघ 2009 मध्ये अस्तित्वात आला. या मतदार संघात पाच लाख 68 हजार 954 मतदार आहेत. आता पोटनिवडणुकीत 50.47 टक्के मतदान झाले आहे. दरम्यान चिंचवडमध्ये 2009 मध्ये 50.53 टक्के, 2014 मध्ये 56.30 टक्के, तर 2019 मध्ये 53.66 टक्के मतदान झाले होते. पोटनिवडणुकीत मतदारांकडून चांगला प्रतिसाद मिळाल्याची चर्चा राजकीय वर्तुळात आहे.

चिंचवडमध्ये भाजप, राष्ट्रवादीच्या उमेदवारांसह एकूण २८ जण आपले नशीब आजमावत आहेत. दरम्यान सकाळी सात वाजता मतदानास सुरूवात झाली होती. सकाळ ते दुपारी तीन वाजेपर्यंत मतदानास संथ प्रतिसाद दिसून आला. मात्र दुपारनंतर मतदारांनी मतदान केंद्राबाहेर लांब रांगा लावल्याचे दिसून आले.

चिंचवड विधानसभेच्या पोटनिवडणुकीत 50.47 टक्के मतदान झाले. त्यातील पहिल्या टप्प्यात सकाळी 7 ते 9 वाजेपर्यंत चिंचवडमध्ये 3.52 टक्के, सकाळी 11 वाजेपर्यंत 10.45 टक्के, दुपारी एक वाजेपर्यंत 20.68 टक्के, दुपारी तीन वाजेपर्यंत 30.55 टक्के सायंकाळी पाच वाजेपर्यंत चिंचवडमध्ये 41.1 टक्के मतदान झाले होते.

आमदार लक्ष्मण जगातप (Laxman Jagtap) यांच्या निधनानंतर महिन्यातच ही निवडणूक जाहीर झाली. भाजपने सुरूवातील ही निवडणूक बिनविरोध करण्याचा प्रयत्न केला. त्यास विरोधकांनी प्रतिसाद दिला नाही. दरम्यान भाजपने आमदार जगताप यांच्या कुटुंबातील उमेदवार दिला. तर महाविकास आघाडीतून इच्छुकांची संख्या मोठी असल्याने उमेदवार ठरण्यास वेळ लागला. अखेर राष्ट्रवादीने नाना काटे यांना उमेदवारी दिली. त्यामुळे ठाकरे गटाचे राहुल कलाटे यांनी बंड पुकारले. त्यामुळे चिंचवडमधील निवडणूक रंगतदार होणार याची प्रचिती आली होती.

चिंचवडमध्ये भाजप आणि महाविकास आघाडीकडून बड्या नेत्यांनी प्रचार केला. येथे मुख्यमंत्री एकनाथ शिंदे, उपमुख्यमंत्री देवेंद्र फडणवीस (Devendra Fadnavis), भाजपचे प्रदेशाध्यक्ष चंद्रशेखर बावनकुळे, पंकजा मुंडे, पालकमंत्री चंद्रकांत पाटील यांनी प्रचार केला.

महाविकास आघाडीकडून राष्ट्रवादीचे अध्यक्ष शरद पवार (Sharad Pawar), काँग्रेसचे प्रदेशाध्यक्ष नाना पटोले, विरोधी पक्षनेते अजित पवार, राष्ट्रवादीचे प्रदेशाध्यक्ष जयंत पाटील, ठाकरे गटाचे अदित्य ठाकरे, धनंजय मुंडे, भास्कर जाधव या नेत्यांनी तोफ डागली. महाविकास आघाडीचे सरकार पडल्याच्या पार्श्वभूमीवर दोन्ही बाजूने ही निवडणूक प्रतिष्ठेची केली होती.

जगताप-कलाटेंच्या कार्यकर्त्यांमध्ये झटापट

चिंचवडची मतदान प्रक्रिया एक घटना वगळता शांतते पार पडली. दरम्यान सकाळच्या सत्रात येथे दोन गटात धक्काबुक्की झाली. अपक्ष उमेदवार कलाटे आणि जगताप यांच्या समर्थकांमध्ये हा वाद झाला होता. मात्र, पोलिसांनी मध्यस्थी केल्यामुळे वाद मिटला. त्यानंतर येथे पोलीस बंदोबस्त वाढवण्यात आली होती.