जमीन NA करण्यासाठी मागितली ४२ लाखांची लाच..तहसीदारांसह पाचजणांवर गुन्हा दाखल तर तलाठी ताब्यात

पिंपरी:एका ट्रस्टची जमिन एनए (अकृषक) करून देण्यासाठी तब्बल ४२ लाख रुपयांची लाच मागण्यात आल्याची खळबळजनक घटना घडली आहे. त्याबाबत शिरूरच्या (जि.पुणे) तत्कालीन तहसीलदार, त्यांच्या कार्यालयातील महसूल सहाय्यक, तलाठी आणि इतर दोन खासगी इसम अशा पाचजणांविरुद्ध लाचखोरीचा गुन्हा आज (ता.२८ नोव्हेंबर) पुण्यातील बंडगार्डन पोलिस ठाण्यात नोंदविण्यात आला. (Crime Latest News)

अमोल तांबे यांनी पुणे लाचलुचपत प्रतिबंधक विभागाचे (ACB) पोलिस अधिक्षक (एसपी) म्हणून कार्यभार स्वीकारल्यानंतर झालेली ही सर्वात मोठी कारवाई आहे. त्यातील पाच आरोपींत मुख्य आरोपी तहसीलदारांसह दोन महिला आहेत. रंजना उमेश उमरहांडे असे त्यांचे नाव आहे. स्वाती सुभाष शिंदे (महसूल सहाय्यक, शिरूर तहसीलदार कार्यालय)सरफराज तुराब देशमुख (तलाठी,शिरूर) आणि खासगी इसम अतुल घाडगे आणि निंबाळकर अशी इतर आरोपींची नावे आहेत.तलाठ्याला एसीबीने ताब्यात घेतले आहे. दरम्यान, या लाचखोरीत पुणे जिल्हाधिकारी कार्यालयातील काही अधिकाऱ्यांचा समावेश असल्याचाही संशय एसीबीला आहे.

तब्बल पाच महिन्यांपासून म्हणजे २५ मे पासून पुणे एसीबीच्या या अगोदरच्या एसपींपासून या लाचखोरीच्या प्रकरणाची पडताळणी सुरु होती. त्यातील तक्रारदार यांच्या ट्रस्टच्या जागेचा एनए प्रस्ताव मंजूर करण्यासाठी तसेच त्याला वरिष्ठ म्हणजे जिल्हाधिकारी कार्यालयातून मंजूरी आणण्यासाठी तलाठी देशमुख यांनी ४२ लाख रुपयांची लाच मागितली होती. त्यात शिंदे यांचा एक, तर उमरहांडेंचा पाच लाख रुपयांचा वाटा होता. घाडगे व निंबाळकर यांनी जिल्हाधिकारी कार्यालयातून 'एनए'चा प्रस्ताव मंजूर करून आणण्यासाठी तसेच त्यात मदत करण्यासाठी वीस लाख रुपये मागितले होते.