Pimpri News : अबब.. चक्क अडीच हजार दिवस सलग तो नोकरीवर आला नाही, अखेर झाला बडतर्फ!

Pimpri Chinchwad News : सरकारी नोकरी हल्ली मिळणे मोठे मुश्किल झाले आहे. तर दुसरीकडे ज्यांच्याकडे सरकारी नोकरी आहे, त्यांना त्याची पर्वाच नसल्याचा प्रत्यय पिंपरी महापालिकेत (PCMC) आला आहे. तेथील एक शिपाई चक्क सात वर्षे कुठलेच कारण न देता विनापरवाना कामावर आलाच नाही. त्याची परिणाम म्हणजे आज या कर्मचाऱ्याला सेवेतून काढून टाकण्यात आले. (Latest Maratthi News)

गुन्हेगारी वर्तन आणि लाचखोरीबद्दल यावर्षी व या अगोदरची पिंपरी-चिंचवड महापालिकेतील अनेक कर्मचारी हे निलंबित झालेले आहेत. त्यातील लाचखोरीतील पुन्हा कामावरही रुजू झाल्याचे दिसून आले आहे. मात्र, तब्बल दोन हजार २५५ दिवस गैरहजर राहिल्याने या पालिकेचा कर्मचारी प्रथमच बडतर्फ झाला आहे.

सुनील वसंत पाटील असे त्याचे नाव आहे. 'ह' क्षेत्रीय कार्यालयात तो शिपाई होता. पालिका आयुक्त तथा प्रशासक शेखरसिंह यांनी आज त्याला सेवेतून काढल्याचा आदेश जारी केला. त्यापूर्वी त्याला सुधारण्याच्या म्हणजे सेवेत राहण्याच्या अनेक संधी देण्यात आल्या होत्या. पण, ती एकही त्याने घेतली नाही. एवढेच नाही, तर गैरहजर राहिल्याचे कारणही त्याने अद्यापर्यंत दिलेले नाही. त्याबद्दल खुलासा केला नाही. काढण्यात आलेल्या नोटीसांनाही त्याने केराची टोपली दाखवली. त्यातून त्याला नोकरीची गरज व गांभीर्य नसल्याने आयुक्तांनी कारवाईचे शेवटचे पाऊल उचलले.

दरम्यान, पाटील हा त्याच्या राहत्या पत्यावर आढळला नाही. त्यामुळे त्याच्याशी पालिकेने केलेला सर्व पत्रव्यवहार परत आला. परिणामी पालिका प्रशासनाने त्याच्या नातेवाईकांशी संपर्क साधण्याचा प्रयत्न केला. पण, त्यालाही यश आले नाही. म्हणून पाटील याला काढून का टाकण्यात येऊ नये, या इशाऱ्याची नोटीस पेपरला देण्यात आली. त्यालाही प्रतिसाद न आल्याने अखेर पालिका प्रशासनाने पोलिसांत (निगडी पोलिस ठाणे) धाव घेतली. तेथे पाटील मिळून येत नसल्याची तक्रार २०२१ ला दिली. तेव्हा त्यांना त्याच्याविरुद्ध विविध प्रकारचे गुन्हे दाखल असल्याचे समजले. तरीही त्यानंतर त्याला सेवेतून काढण्यासाठी त्यांनी दोन वर्षे घेतली.

(Edited By - Chetan Zadpe)