Police complaint against Urfi Javed : अभिनेत्री उर्फी जावेदच्या अडचणी वाढणार? पुण्यात तक्रार दाखल

Urfi Javed News : अभिनेत्री ऊर्फी जावेद तिच्या बोल्ड फॅशनमुळे सोशल मीडियावर कायम चर्चेत असते. तिच्या या वागण्यामुळे भाजप महिला नेत्या चित्रा वाघ (Chitra Wagh) या चांगल्याच आक्रमक झाल्या आहेत. तर आता उर्फी जावेदच्याविरोधात पुण्यातील कोथरूड पोलीस ठाण्यात तक्रार दाखल झाली आहे.

रिपब्लिकन पार्टी ऑफ इंडिया महिला आघाडीच्या महाराष्ट्र प्रदेश सरचिटणीस अर्चीता जोशी यांनी कोथरूड पोलीस ठाण्यात उर्फी जावेदवर सायबर अंतर्गत गुन्हा दाखल करण्याची तक्रार केली आहे. त्यामुळे ऊर्फी जावेदच्या अडचणी वाढण्याची शक्यता आहे.

ऊर्फी जावेद नेहमी वेगवेगळ्या फॅशनमुळे चर्चेत असते. मात्र आता उर्फी जावेद कपड्यामुळेच वादात सापडली आहे. उर्फी जावेदच्या कपड्यावरून चित्रा वाघ या देखील चांगल्याच आक्रमक झाल्यात. चित्रा वाघ यांनी थेट पोलीस आयुक्तांची भेट घेऊन कारवाई करण्याची मागणी केली होती.

दरम्यान, उर्फी जावेद विषयी बोलताना चित्रा वाघ म्हणाल्या, ''एकीकडे निष्पाप महिला विकृतांच्या शिकार होत आहेत. तर ही बया अजून विकृती पसरवतीये'', असं ट्वीट त्यांनी केलं होतं. यानंतर आता रिपब्लिकन पार्टी ऑफ इंडिया महिला आघाडीच्यावतीने उर्फी जावेदवर गुन्हा दाखल करावा, अशी मागणी करण्यात आलीय. त्यामुळे उर्फी जावेद अडचणीत येण्याची शक्यता आहे.