Pune News : राज ठाकरेंची भेट घेतल्यानंतर रिक्षा संघटनांचे पदाधिकारी आपसातच भिडले

पिंपरी : बेकायदेशीर बाईक टॅक्सी सेवेला विरोध या मुख्य मागणीसह इतर मागण्यांसाठी पिंपरी-चिंचवड (Pimpri-Chinchwad) आणि पुण्यातील रिक्षाचालकांनी काल (ता.२८) संप केला. आंदोलन करीत त्यांनी पुणे आरटीओ कार्यालयावर रिक्षांचा धडक मोर्चा काढून चक्काजाम केले. त्यानंतर त्यांनी पुणे येथे मनसे अध्यक्ष राज ठाकरे (Raj Thackeray) यांची आज भेट घेतली, त्यानंतर दोन संपकरी संघटना पदाधिकाऱ्यांतील मतभेद समोर आले.

पुणे, पिंपरी-चिंचवडमधील बारा रिक्षा संघटनांनी एकत्र येत सोमवारी आंदोलन केले. त्यातील महाराष्ट्र रिक्षा पंचायतचे संस्थापक अध्यक्ष पिंपरी-चिंचवडकर बाबा कांबळे (Bala Kamble) आणि पुण्यातील बसतोय रिक्षावाला संघटनेचे केशव क्षीरसागर यांच्यातील मतभेद पुण्यातील राज यांच्या राजमहल निवासस्थानातील भेटीनंतर समोर आले.

महत्वाचे मुद्दे राज यांच्यासमोर मांडू दिले नाहीत, तसेच इतर रिक्षा संघटनांच्या प्रतिनिधींनाही बोलण्याची संधी न दिल्याने कांबळे हे क्षीरसागरांवर चर्चा करून बाहेर पडताच संतापले. दरम्यान, आम्ही फक्त प्रश्न सोडवायलाच असतो, अशी मिश्कील टिपण्णी या चर्चेदरम्यान राज यांनी केली.

क्षीरसागरांशी मतभेद झाल्याची कबुली कांबळेंनी 'सरकारनामा'शी बोलताना दिली. राज हे आमच्या मागण्यासंदर्भात मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याशी बोलणार आहेत, असे ते म्हणाले. मनसेचे पुणे शहराध्यक्ष साईनाथ बाबर, त्यांच्या वाहतूक आघाडीचे अध्यक्ष किशोर चिंतामणी तसेच शिवाजी मते हे सोमवारच्या रिक्षा संघटनांच्या आंदोलनात सामील झाले होते. त्यांनी पाठिंबा दिला होता. म्हणून पुणे दौऱ्यावर असलेल्या राज ठाकरे यांच्याशी त्यांनी चर्चा करण्यास आंदोलक रिक्षा संघटनांच्या प्रतिनिधींना बोलावले होते.