Ajit Pawar NCP: अजितदादांना पुण्यात सर्वात मोठा धक्का बसणार; राष्ट्रवादीच्या नाराज 'रणरागिणी'नं पहिलं पाऊल टाकलं; श्रीकांत शिंदेंची घेतली भेट

Pune News : गेल्या काही दिवसांपूर्वी राज्य महिला आयोगाच्या अध्यक्ष रुपाली चाकणकर आणि त्यांच्याच राष्ट्रवादी काँग्रेस अजित पवार पक्षातील फायरब्रँड नेत्या रुपाली पाटील ठोंबरे या दोन्ही महिला नेत्यांमधील वार-प्रतिवार राजकीय वर्तुळात चर्चेचा विषय ठरले होते. रुपाली चाकणकर यांच्या राजीनाम्याची मागणीही रुपाली पाटील ठोंबरे यांनी केली होती. या वादासंदर्भात पक्षाने त्यांना नोटीस दिल्यानंतर राष्ट्रवादी काँग्रेसने मोठा निर्णय घेत रुपाली पाटील ठोंबरे (Rupali Patil Thombare) यांची प्रवक्तेपदावरून उचलबांगडी केली आहे. आता याच रुपाली पाटील ठोंबरे या मोठा राजकीय निर्णय घेण्याच्या तयारीत आहे.

राष्ट्रवादी काँग्रेसच्या महिला प्रदेशाध्यक्षा रुपाली चाकणकरांवर गंभीर आरोप केल्यानंतर उपमुख्यमंत्री अजित पवारांनीही रुपाली पाटील ठोंबरे यांना खडेबोल सुनावल्याची चर्चा होती. तसेच त्यांना खुलासाही मागितला होता. पुण्याच्या तडफदार महिला नेत्या रुपाली ठोंबरे पाटील गेल्या काही महिन्यांपासून पक्षात नाराज असल्याचंही बोललं जात आहे.

याचदरम्यान, रुपाली पाटील ठोंबरे यांनी शिवसेनेचे मुख्य नेते एकनाथ शिंदे (Eknath Shinde) यांचे चिरंजीव व खासदार श्रीकांत शिंदे यांची भेट घेतली. या भेटीनंतर त्यांच्या शिवसेनेच्या पक्षप्रवेशाच्या चर्चांना उधाण आलं आहे. काही महिन्यांपूर्वीच काँग्रेसचे माजी आमदार रवींद्र धंगेकर यांनी एकनाथ शिंदेंच्या शिवसेनेत प्रवेश केला होता. त्यानंतर त्यांनी भाजपच्या पुण्यातील वरिष्ठ नेत्यांवरच खळबळजनक आरोप करत महायुतीतच दंगा सुरू केला होता.

माजी आमदार रवींद्र धंगेकरांनंतर आता राष्ट्रवादी काँग्रेसच्या पुण्यातील तडफदार नेत्या रुपाली पाटील ठोंबरे यांनीही जर शिवसेनेत पक्षप्रवेश केला तर आणखी एकनाथ शिंदेंच्या पक्षाची महानगरपालिकेच्या तोंडावर मोठी ताकद वाढणार आहे. सध्या शिंदेंच्या शिवसेनेत पुण्यात चर्चेतील आक्रमक महिला चेहरा कुणी नाहीये, तेव्हा ही कमतरता रुपाली पाटील ठोंबरे या भरुन काढू शकतात.

आगामी काळात होत असलेल्या महापालिका निवडणुकांची घोषणा होण्याची शक्यता वर्तवली जात आहे. त्याच पार्श्वभूमीवर आता रुपाली पाटील ठोंबरे यांनी आज शिवसेनेचे (Shivsena) नेते तथा खासदार श्रीकांत शिंदे यांची भेट घेतल्याचं बोललं जात आहे. या भेटीनंतर रुपाली पाटील ठोंबरे यांच्या शिवसेना पक्षप्रवेशाच्या चर्चांना वेग आला आहे. काही दिवसांपूर्वीच रुपाली पाटील ठोंबरे यांनी धंगेकर माझे भाऊ आहेत असं म्हटलं होतं.

सत्ताधारी राष्ट्रवादी काँग्रेस पक्षात असूनही रुपाली पाटील ठोंबरे यांनी महायुती सरकारवरच ताशेरे ओढले होते. तसेच त्यांनी पक्षाच्या महिला प्रदेशाध्यक्षा व राज्य महिला आयोगाच्या अध्यक्षा रुपाली चाकणकर यांच्यासोबतही पंगा घेतला होता. चाकणकरांसोबत घेतलेला पंगा महागात पडल्याची चर्चा सुरू असतानाच त्यांनी काही दिवसांपूर्वीच पक्षांतराचे तसे संकेतही दिले होते.

शिवसेनेचे खासदार श्रीकांत शिंदे यांची मुंबईत भेट घेतल्यानंतर रुपाली पाटील यांनी एका व्हिडिओच्या माध्यमातून संवाद साधत मोठं विधान केलं आहे. शिवसेनेनं जर मला ऑफर दिली, तर मी विचार करेन, असं रुपाली पाटील ठोंबरेंनी स्पष्ट करत पक्षातरांचे संकेतच दिले आहेत. पण त्याचवेळी त्यांनी ही भेट मी महायुतीतील घटक पक्ष म्हणून, कामानिमित्त घेतल्याचं सांगितलं. यावेळी त्यांच्यासोबत काँग्रेसच्या संगिता तिवारी आणि शिंदे गटाच्या शर्मिष्ठा येवलेही उपस्थित होत्या.